जळगाव मिरर | १३ ऑगस्ट २०२६
शिरोमणी अकाली दलाचे अध्यक्ष तथा पंजाबचे माजी उपमुख्यमंत्री सुखबीरसिंग बादल यांच्यावर गुरुवारी नांदेडमध्ये हल्ला करण्यात आल्याने खळबळ उडाली. प्राथमिक माहितीनुसार, गुरुद्वारा माता साहिब कौर येथे एका निहंगाने कृपाणाने बादल यांच्यावर हल्ला करण्याचा प्रयत्न केला. या घटनेत बादल यांच्या हाताला दुखापत झाली असून, त्यांच्या सुरक्षेसाठी तैनात असलेला एक पोलिस कर्मचारीही जखमी झाला आहे. घटनेनंतर बादल यांना उपचारासाठी खासगी रुग्णालयात दाखल करण्यात आले.
मिळालेल्या माहितीनुसार, सुखबीरसिंग बादल कुटुंबासह नांदेडमध्ये आले होते. गुरुद्वारा माता साहिब कौर येथे ते प्रार्थनेसाठी गेले असताना हा प्रकार घडला. तेथे उपस्थित असलेल्या एका व्यक्तीने अचानक धारदार शस्त्राने त्यांच्यावर हल्ला करण्याचा प्रयत्न केला. हल्ल्यावेळी सुरक्षा कर्मचाऱ्यांनी तातडीने हस्तक्षेप करत हल्लेखोराला रोखले. या झटापटीत सुरक्षा कर्मचाऱ्यालाही दुखापत झाली. बादल यांच्या हाताला दुखापत झाली असून त्यांची प्रकृती सध्या स्थिर असल्याचे प्राथमिक वृत्त आहे. त्यांच्या प्रकृतीबाबत अधिकृत वैद्यकीय अहवालाची प्रतीक्षा आहे.
घटनेनंतर उपस्थित सुरक्षा कर्मचारी आणि नागरिकांनी संशयित हल्लेखोराला पकडले. पोलिसांनी त्याला ताब्यात घेतले असून, हल्ल्यामागील नेमके कारण शोधण्यासाठी चौकशी सुरू केली आहे. घटनेचे सीसीटीव्ही फुटेज तसेच प्रत्यक्षदर्शींची माहिती तपासली जात असल्याचे वृत्त आहे.
राजकीयदृष्ट्या महत्त्वाच्या नेत्यावर धार्मिक स्थळी धारदार शस्त्राने हल्ल्याचा प्रयत्न झाल्याने नांदेडमधील सुरक्षा व्यवस्थेवरही प्रश्न उपस्थित झाले आहेत. विशेषतः बादल यांच्यासारख्या वरिष्ठ राजकीय नेत्याच्या सुरक्षेत असतानाही हल्लेखोर त्यांच्यापर्यंत पोहोचल्याने सुरक्षा यंत्रणांसमोर गंभीर प्रश्न निर्माण झाला आहे. दरम्यान, पोलिसांकडून घटनेचा सखोल तपास सुरू असून हल्ल्याचे नेमके कारण आणि हल्लेखोराचा उद्देश तपासानंतर स्पष्ट होणार आहे.
