जळगाव मिरर | २२ जुलै २०२६
नशिराबाद परिसरात सुरू असलेल्या अनैतिक मानवी व्यापाराविरोधात नशिराबाद पोलिसांनी धडक कारवाई करत वेश्याव्यवसायाच्या अड्ड्यावर छापा टाकला. या कारवाईत दोन संशयितांना अटक करण्यात आली असून, दोन पीडित महिलांची सुटका करण्यात आली आहे. तसेच घटनास्थळावरून ९१ हजार ६०० रुपयांचा मुद्देमाल जप्त करण्यात आला आहे. या कारवाईमुळे परिसरात अनैतिक व्यवसाय करणाऱ्यांमध्ये मोठी खळबळ उडाली आहे.
पोलिसांनी दिलेल्या माहितीनुसार, २१ जुलै रोजी नशिराबाद पोलिस ठाण्याच्या सहायक पोलिस निरीक्षक योगिता नारखेडे यांना गोपनीय माहिती मिळाली होती. नशिराबादहून सुनसगावकडे जाणाऱ्या रस्त्यालगत असलेल्या एका शेतात वेश्याव्यवसाय सुरू असल्याची माहिती मिळाल्यानंतर पोलिसांनी प्रथम माहितीची खातरजमा केली. त्यानंतर पंचांच्या उपस्थितीत संबंधित ठिकाणी नियोजनबद्ध छापा टाकण्यात आला. छाप्यादरम्यान तेथे अनैतिक मानवी व्यापार सुरू असल्याचे स्पष्ट झाल्यानंतर पोलिसांनी तातडीने कारवाई करत प्रदीप जनार्दन रोटे (वय ५७) आणि कैलास संजय भोई (दोघे रा. नशिराबाद) यांना ताब्यात घेतले. तपासात संबंधित ठिकाणी कुंटणखाना चालविला जात असल्याचे निष्पन्न झाले.
कारवाईदरम्यान पोलिसांनी दोन पीडित महिलांची सुटका करून त्यांना सुरक्षित ठिकाणी हलविले. तसेच घटनास्थळावरून रोख रक्कम आणि इतर साहित्य असा एकूण ९१ हजार ६०० रुपयांचा मुद्देमाल जप्त करण्यात आला.
याप्रकरणी नशिराबाद पोलिस ठाण्यात संबंधित कायद्यांनुसार गुन्हा दाखल करण्यात आला असून, अटक करण्यात आलेल्या आरोपींकडून अधिक चौकशी सुरू आहे. या रॅकेटमध्ये आणखी कोणाचा सहभाग आहे का, याचाही तपास पोलिसांकडून केला जात आहे.
ही कारवाई जिल्हा पोलिस अधीक्षक श्रीकांत धिवरे, अपर पोलिस अधीक्षक संदीप गावित आणि भुसावळ विभागाचे उपविभागीय पोलिस अधिकारी केदार बारवाले यांच्या मार्गदर्शनाखाली पार पडली. कारवाईत सहायक पोलिस निरीक्षक योगिता नारखेडे यांच्यासह गुणवंत देशमुख, प्रशांत विरणारे, भरत बाविस्कर, पंकज सोनवणे, सागर बिडे, प्रवीण लोहार आणि भूषण पाटील यांनी सहभाग घेतला.
पुढील तपास सहायक पोलिस निरीक्षक योगिता नारखेडे करीत आहेत. तसेच नागरिकांनी परिसरात अनैतिक मानवी व्यापार किंवा अशा प्रकारचे बेकायदेशीर प्रकार सुरू असल्याची माहिती तात्काळ पोलिसांना द्यावी. माहिती देणाऱ्यांची ओळख पूर्णपणे गोपनीय ठेवली जाईल, असे आवाहन नशिराबाद पोलिसांनी केले आहे.
