जळगाव मिरर | 21 एप्रिल 2026
भुसावळ सोशल मीडियावरील बनावट ओळख, परदेशातून पार्सल व डॉलरची लालूच आणि एफबीआय, अमेरिकन सैन्य तसेच भारतीय कस्टम विभागाची भीती दाखवत भुसावळ एमआयडीसीतील एका कामगाराकडून तब्बल ३ लाख ४७ हजार रुपयांची फसवणूक केल्याचा धक्कादायक प्रकार उघडकीस आला आहे. याप्रकरणी बाजारपेठ पोलिस ठाण्यात गुन्हा दाखल करण्यात आला आहे.
एमआयडीसी परिसरातील एका कंपनीत मशीन ऑपरेटर म्हणून कार्यरत असलेले चंदन मुन्ना मौर्य (वय ३४) हे या फसवणुकीचे बळी ठरले आहेत. ८ जून २०२४ रोजी ‘टेलर’ नावाच्या फेसबुक पेजवरून त्यांच्याशी संपर्क साधण्यात आला. सुरुवातीला साधा संवाद साधत आरोपींनी त्यांचा विश्वास संपादन केला. काही दिवसांनी मियामी (अमेरिका) येथून मौल्यवान पार्सल पाठविल्याचे सांगण्यात आले.
यानंतर डिलिव्हरी चार्जेसच्या नावाखाली पैशांची मागणी सुरू झाली. सुरुवातीला मौर्य यांनी नकार दिला. मात्र “सुडान युद्धात अडकलो आहे”, “पार्सलमध्ये मोठी डॉलरची रक्कम आहे”, “एफबीआय, अमेरिकन पोलिस आणि भारतीय कस्टम विभाग कारवाई करेल” अशा धमक्या देत आणि आमिष दाखवत आरोपींनी त्यांना जाळ्यात ओढले. ई-मेल व व्हिडिओ कॉलच्या माध्यमातून बनावट अधिकारी, सैन्य व कस्टम कारवाईचे नाट्यही रचण्यात आले.
डिलिव्हरी चार्जेस, कस्टम शुल्क, वकील फी, एफआययू प्रमाणपत्र, वायर कोड, पार्सल देखभाल शुल्क अशा विविध कारणांखाली वेळोवेळी पैशांची मागणी करण्यात आली. जून २०२४ ते एप्रिल २०२५ या कालावधीत मौर्य यांनी विविध बँक खात्यांमध्ये ऑनलाईन व्यवहाराद्वारे एकूण ३ लाख ४७ हजार रुपये जमा केले.
दरम्यान, संबंधित परदेशी व्यक्ती हिंदी भाषेत संवाद साधत असल्याचे लक्षात आल्यानंतर मौर्य यांना संशय आला. त्यानंतर त्यांनी अधिक चौकशी केल्यावर आपण फसवणुकीचे बळी ठरलो असल्याचे स्पष्ट झाले. यानंतर त्यांनी तातडीने बाजारपेठ पोलिस ठाण्यात तक्रार दाखल केली.
या प्रकरणाचा पुढील तपास पोलिसांकडून सुरू असून, नागरिकांनी सोशल मीडियावरील अनोळखी व्यक्तींवर विश्वास ठेवू नये, तसेच कोणत्याही आमिषांना बळी पडू नये, असे आवाहन पोलिसांनी केले आहे.
