जळगाव मिरर | २ जून २०२५
मध्यरात्रीच्या सुमारास गोलाणी मार्केटमधील दुकान फोडून महागडे मोबाईल चोरुन नेणाऱ्या टोळीचा शहर पोलिसांनी पर्दाफाश केला. चोरी करणाऱ्या दोन चोरट्यांच्या मुसक्या आवळल्या असून एक संशयित पसार झाला आहे. त्यांच्याकडून ३० हजारांचे तीन मोबाईल जप्त केले आहे.
सविस्तर वृत्त असे कि, शहरातील गोलाणी मार्केटमधील इ विंगमधील पुजा मोबाईल शॉपी या दुकानात दि. १२ मे रोजी पहाटेच्या सुमारास चोरट्यांनी चोरी करुन ५० हजारांचा ऐवज चोरुन नेला होता. पोलीस अधीक्षक डॉ. महेश्वर रेड्डी यांनी हा गुन्हा उघडकीस आणण्याच्या सूचना शहर पोलीस ठाण्याचे पोलीस निरीक्षक अनिल भवारी यांना दिल्या होत्या. त्यानुसार भवारी यांनी गुन्हे शोध पथकातील सपोनि रामचंद्र शिखरे, सफौ सुनिल पाटील, पोहेकॉ संतोष खवले, उमेश भांडारकर, सतिष पाटील, भास्कर ठाकरे, किशोर निकुंभ, योगेश पाटील, अमोल ठाकूर, राहुल पांचाळ, प्रणय पवार यांचे पथक तयार केले होते.
घटनास्थळी मिळालेल्या पुराव्यांसह त्यांना मिळालेल्या माहितीनुसार ही चोरी संशयित समीर युसूफ शेख (वय १९, रा. पिंप्राळा हुडको), अबरार उर्फ चिरक्या हमीद खाटीक (वय २०, उस्मानिया पार्क, उमर कॉलनी) व अनिल उर्फ मारी भगवान सोनवणे (वय १९, रा. पिंप्राळा हुडको) यांच्या पथकाने केली. त्यानुसार पथकाने संशयित समीर शेख व अबरार उर्फ चिरक्या खाटीक यांच्या मुसक्या आवळल्या.
पथकाने संशयित चोरट्यांच्या मुसक्या आवळल्यानंतर त्यांच्याकडून चोरलेले तीन मोबाईल जप्त करण्यात आले आहे. या टोळीतील संशयित अबरार उर्फ चिरक्या हमीद खाटीक याच्याविरुद्ध रामानंद नगर पोलिसात जीवेठार मारण्याचा प्रयत्न केल्याप्रकरणी तर अनिल उर्फ मारी सोनवणे याच्याविरद्ध घरफोडीचा गुन्हा दाखल असून तो फरार आहे.
