जळगाव मिरर | १५ मार्च २०२६
जळगाव शहरातील नागरिकांना घरगुती गॅस सिलेंडर वेळेवर मिळावा तसेच बुकिंग आणि वितरणाच्या प्रक्रियेत येणाऱ्या अडचणी दूर करण्यासाठी जिल्हाधिकारी कार्यालयात रविवारी महत्त्वपूर्ण बैठक पार पडली. जिल्हाधिकारी रोहण घुगे यांच्या अध्यक्षतेखाली झालेल्या या बैठकीत गॅस एजन्सी धारक, व्यवस्थापक तसेच भारत पेट्रोलियम, इंडियन ऑइल आणि एचपीसीएल या तीनही तेल कंपन्यांचे अधिकारी व्हिडिओ कॉन्फरन्सद्वारे सहभागी झाले होते.
बैठकीत जळगाव शहरातील गॅस सिलेंडर वितरण व्यवस्था अधिक सुरळीत करण्याबाबत चर्चा करण्यात आली. बुकिंगनंतर ग्राहकांना सिलेंडर मिळण्यात होणारा विलंब, वितरणातील अडचणी तसेच एजन्सी स्तरावर येणाऱ्या तांत्रिक समस्यांबाबतही सविस्तर आढावा घेण्यात आला.
यावेळी जिल्हाधिकारी रोहण घुगे यांनी नागरिकांना दिलासा देताना सांगितले की, जळगावमध्ये गॅस सिलेंडरचा पुरेसा साठा उपलब्ध आहे. त्यामुळे ग्राहकांनी कोणतीही भीती बाळगू नये. सर्वांना वेळेवर सिलेंडर मिळेल, यासाठी प्रशासन व कंपन्यांकडून आवश्यक त्या उपाययोजना केल्या जात आहेत. बैठकीत वितरण प्रक्रियेत पारदर्शकता राखण्यावर तसेच ग्राहकांना बुकिंगनंतर कमीत कमी वेळेत सिलेंडर उपलब्ध करून देण्यासाठी एजन्सींनी समन्वयाने काम करण्याच्या सूचना देण्यात आल्या.
या बैठकीला हर्षिल गॅसचे व्यवस्थापक किशोर सपके, कौशिकी भारत गॅसचे संचालक सौरभ चौबे, हेमंत चौधरी, शुभम चौबे, रेखा गॅसचे ललित वाणी, भूषण गॅस एजन्सीचे मालक भूषण चौधरी, राहुल ललवाणी, रमेश विसपुते, समर्थ गॅस (जामनेर)चे मालक अभिषेक पाटील, सुभाष जैन, सौरभ पाटणी आदी उपस्थित होते. प्रशासन आणि गॅस एजन्सी यांच्यातील या समन्वय बैठकीमुळे शहरातील गॅस वितरण व्यवस्था अधिक सक्षम होईल, अशी अपेक्षा व्यक्त करण्यात येत आहे.
