जळगाव मिरर | १० जुलै २०२३
शहरातील अनेक भागात अवैध वाळूचा उपसा सुरूच आहे. ट्रॅक्टर किंवा डंपरमधून वाळू वाहतूक केल्यास त्यावर कारवाई केली जात असल्याने वाळू वाहतूक करणाऱ्यांनी आता नवीन शक्कल लढविली आहे चक्क मालवाहू वाहनातून वाहतूक करणे सुरू केले आहे. असाच प्रकार सुरू असताना तालुका पोलिसांनी एक मालवाहू वाहन व एक ब्रास वाळू असा एकूण दोन लाख ३० हजार रुपयांचा मुद्देमाल जप्त केला.
मिळालेल्या माहितीनुसार, जळगाव ते आव्हाणे दरम्यान ९ जुलै रोजी पहाटे मालवाहू वाहनातून (क्र. एम एच ०५, ई एल १३०५) वाळू वाहतूक सुरू असल्याचे निदर्शनास आले. त्यावेळी तालुका पोलिसांनी वाहन थांबवून विचारणा केली असता वाहन चालकाकडे कोणताही वाळू वाहतुकीचा परवाना आढळून आला नाही. त्यामुळे तालुका पोलिसांनी तीन हजार रुपये किमतीची एक ब्रास वाळू व दोन लाख रुपये किमतीचे मालवाहू वाहन जप्त केले. याप्रकरणी पोलिस कॉन्स्टेबल प्रशांत ठाकूर यांच्या फिर्यादीवरून वाहनाचा चालक प्रवीण सपकाळे (३५, रा. आव्हाणे) याला अटक करण्यात आली असून गुन्हा दाखल करण्यात आला आहे. प्रभारी अधिकारी अप्पासाहेब पवार यांनी भेट दिली. पुढील तपास पोलिस नाईक उमेश ठाकूर करीत आहेत.