जळगाव मिरर । १३ ऑक्टोबर २०२५
जिल्ह्यातील चोपडा तालुक्यातील बुधगाव ते जळोद रस्त्यावर अवैध वाळू वाहतूक करणाऱ्या ट्रॅक्टरवर कारवाई करत असताना ट्रॅक्टर चालक आणि मालकाने ग्राम महसूल अधिकारी अनंत कबीर माळी (तलाठी) यांना थेट ट्रॅक्टरखाली ओढून जीवघेणा हल्ला केल्याची घटना दि. १२ रोजी सकाळी ६ वाजता घडली. महसूल अधिकाऱ्याला जीवे ठार मारण्याचा प्रयत्न झाल्यामुळे महसूल विभागात खळबळ उडाली आहे. याप्रकरणी ट्रॅक्टर चालक आणि मालकावर चोपडा ग्रामीण पोलीस ठाण्यात गुन्हा दाखल करण्यात आला आहे.
तालुक्यातील बुधगाव ते जळोद दरम्यानच्या पुलाखाली वाळूची चोरी होत असल्याची गोपनीय माहिती अमळनेर प्रांत अधिकाऱ्यांना मिळाली होती. त्यानुसार त्यांनी हातेड भागातील मंडळाधिकारी रवींद्र माळी, ग्राम महसूल अधिकारी अनंत कबीर माळी, संतोष कोळी, सुधाकर महाजन, तिलेश पवार आणि भूषण पवार यांचे पथक दि.१२ रोजी पहाटे ४ वाजता कारवाईसाठी गेले सकाळी ६ वाजण्याच्या सुमारास बुधगाव गावाच्या हद्दीत, बुधगाव ते जळोद रस्त्यावरील पुलाखाली तापी नदीपात्रात पथकाला एक ट्रॅक्टर वाळू भरून येताना दिसला. महसूल पथकाला पाहून तो ट्रॅक्टर सह पळून गेला. पाठलाग करत सदर ट्रॅक्टर जमा करून चोपडा तहसील कार्यालयात नेत असताना ग्राम महसूल अधिकारी अनंत कबीर माळी हे ट्रॅक्टरवर बसले होते. यावेळी ट्रॅक्टर चालक विजय पावरा आणि ट्रॅक्टर मालक अजय कैलास कोळी (दोघेही रा. बुधगाव) यांनी रस्त्यात वाद घातला. वादाचे रूपांतर हाणामारीत झाले. चालक विजय पावरा याने ट्रॅक्टरवर बसलेल्या ग्राम महसूल अधिकारी अनंत कबीर माळी यांची कॉलर पकडून त्यांना खाली ओढले आणि जीवे ठार मारण्याच्या उद्देशाने थेट ट्रॅक्टरच्या डाव्या बाजूस असलेल्या मागील चाकाच्या समोर फेकून दिले.
सदर प्रकार पाहून सोबत असलेले मंडळाधिकारी रवींद्र माळी यांनी त्वरीत अनंत माळी यांना तत्काळ बाजूला ओढले. त्यामुळे माळी यांचा जीव वाचला, मात्र या घटनेत त्यांच्या पायाला आणि कमरेला गंभीर दुखापत झाली आहे. यानंतर चालक आणि मालक यांनी ट्रॅक्टरमधील वाळू खाली ओतून ट्रॅक्टर घेऊन घटनास्थळावरून पळ काढला. घटनास्थळी पोलिस निरीक्षक मधुकर साळवे व पोलिस पथकाने भेट देऊन पंचनामा केला आहे.
जखमी झालेले ग्राम महसूल अधिकारी अनंत माळी यांना उपचारासाठी चोपडा उपजिल्हा रुग्णालयात दाखल करण्यात आले आहे. मंडळाधिकारी रवींद्र माळी यांनी दिलेल्या फिर्यादीवरून ट्रॅक्टर चालक विजय पावरा आणि मालक अजय कैलास कोळी यांच्याविरोधात चोपडा ग्रामीण पोलिसात गुन्हा दाखल करण्यात आला आहे. पुढील तपास सपोनी शेषराव नितनवरे करीत आहेत.
