जळगाव मिरर | १ जून २०२६
मध्यप्रदेशातील बडवानी जिल्ह्यातील सेंधवा शहरापासून सुमारे १० किलोमीटर अंतरावर मुंबई–आग्रा राष्ट्रीय महामार्गावर सोमवारी सकाळी झालेल्या भीषण अपघातात महाराष्ट्रातील दोन तरुणांचा मृत्यू झाला असून अन्य दोघे गंभीर जखमी झाले आहेत. मृतांमध्ये छत्रपती संभाजीनगर येथील लोकप्रिय टेनिस क्रिकेटपटू अनिकेत काळे याचाही समावेश असल्याने क्रीडा वर्तुळात हळहळ व्यक्त होत आहे.
पोलिसांनी दिलेल्या माहितीनुसार, महाराष्ट्रातील छत्रपती संभाजीनगर आणि पुणे येथील चार तरुण कारने (एमएच ११ सीडब्ल्यू ४६४४) इंदूरकडे जात होते. सोमवारी सकाळी सुमारे ७ वाजेच्या सुमारास सेंधवाजवळील जामली टोल प्लाझा परिसरात त्यांच्या कारवरील चालकाचे नियंत्रण सुटले. कारने दुभाजक ओलांडत चुकीच्या दिशेने प्रवेश केला. त्याचवेळी समोरून भरधाव वेगाने येणाऱ्या कंटेनरने (यूपी २१ डीटी २९९६) कारला जोरदार धडक दिली.
या भीषण धडकेत कारचा अक्षरशः चक्काचूर झाला. अपघात इतका भीषण होता की, छत्रपती संभाजीनगर येथील बद्रीनाथ नांगरे (वय ३०) यांचा जागीच मृत्यू झाला. तर अनिकेत काळे (वय २८) याने उपचारादरम्यान सेंधवा येथील शासकीय रुग्णालयात अखेरचा श्वास घेतला. अपघातात भूषण राजाराम (वय २५, रा. पुणे) आणि औकार अमित (वय २६, रा. छत्रपती संभाजीनगर) हे गंभीर जखमी झाले असून त्यांच्यावर खासगी रुग्णालयात उपचार सुरू आहेत.
दरम्यान, मृत्यू झालेला अनिकेत काळे हा महाराष्ट्रातील टेनिस क्रिकेट क्षेत्रातील परिचित नाव मानला जात होता. विशेषतः छत्रपती संभाजीनगर परिसरात तो धडाकेबाज फलंदाजी, आक्रमक खेळशैली आणि ‘रिव्हर्स शॉट’साठी प्रसिद्ध होता. सोशल मीडियावरही त्याचे मोठे चाहते असल्याची माहिती समोर आली आहे. त्याच्या निधनाची बातमी समजताच क्रीडा क्षेत्रात शोककळा पसरली आहे.
घटनेची माहिती मिळताच ग्रामीण पोलीस तसेच डायल-११२ चे पथक तातडीने घटनास्थळी दाखल झाले. जखमींना आणि मृतांना रुग्णवाहिकेच्या सहाय्याने रुग्णालयात हलविण्यात आले. पोलिसांनी अपघातग्रस्त कंटेनर जप्त केला असून अपघातानंतर चालक घटनास्थळावरून फरार झाला आहे. त्याचा शोध सुरू असून पुढील तपास पोलिसांकडून करण्यात येत आहे.
