जळगाव मिरर । २९ सप्टेंबर २०२५
जिल्ह्यातील जामनेर शहरात बेकायदेशीर पद्धतीने सुरू असलेल्या गॅस भरण्याच्या व्यवसायामुळे मोठा अपघात घडला आहे. चारचाकी गाडीमध्ये गॅस भरत असताना अचानक सिलेंडरचा स्फोट झाला. या घटनेमुळे परिसरात एकच घबराट पसरली. सुदैवाने, या स्फोटात कोणतीही जीवितहानी झाली नाही, परंतु संबंधित चारचाकी वाहनाचे मोठे नुकसान झाले आहे.
मिळालेल्या माहितीनुसार, जामनेर शहरात सुरू असलेल्या अवैध गॅस भरण्याच्या व्यवसायावर गंभीर प्रश्नचिन्ह निर्माण झाले आहे. पोलिसांचे याकडे दुर्लक्ष होत असल्याचा आरोप नागरिकांनी केला आहे. या प्रकारामुळे भविष्यात आणखी मोठे अपघात होण्याची शक्यता असल्याने नागरिकांनी प्रशासनाकडे कठोर कारवाईची मागणी केली आहे. घटनेची माहिती मिळताच जामनेर पोलिसांनी तात्काळ घटनास्थळी धाव घेतली. प्राथमिक तपासामध्ये हे गॅस भरण्याचे काम बेकायदेशीररीत्या सुरू असल्याचे निष्पन्न झाले. त्यानंतर पोलिसांनी संबंधित दुकानदार आणि गॅस भरणाऱ्या वाहनधारकावर तात्काळ कारवाई केली. पोलिसांनी दिलेल्या माहितीनुसार, दुकानदार आणि वाहनधारक दोघेही अनेक दिवसांपासून हा अवैध व्यवसाय करत होते. या घटनेनंतर पोलिसांनी शहरातील इतर ठिकाणीही अशाच प्रकारे सुरू असलेल्या अवैध व्यवसायांचा शोध घेण्याचे काम सुरू केले आहे.
