जळगाव मिरर | १२ मे २०२४
जळगाव जिल्ह्यात लोकसभा निवडणुकीची धामधूम संपली असून आता दि.१३ रोजी जिल्ह्यातील प्रत्येक ठिकाणी मतदान होत आहे. नेहमीच मतदानाची टक्केवारी वाढण्यासाठी प्रशासनासह विविध सामाजिक संस्थेच्या माध्यमातून मतदानाची जनजागृती होत असते. उद्या म्हणजेच दि.१३ रोजी जळगाव जिल्ह्यातील प्रत्येक गावागावात मतदान होत आहे. प्रत्येक नागरिकाने आपला मतदानाचा हक्क बजावला पाहिजे असे देखील आवाहन करण्यात येत असते.
त्यानंतरही अनेक जण मतदान करण्याऐवजी सरकारी सुट्टीचा उपभोग घेत घरीच थांबतात. यामुळे मतदानाचा टक्का वाढत नाही. आता मतदानाचा टक्का वाढवण्यासाठी सर्वसामान्य लोकांनी आपला खारीचा वाटा उचलला आहे. बोटाला शाई दाखवा आणि मोफत उपचार घ्या. असा फंडा जळगाव शहरातील मधुदत्त मेटरनिटी आणि नर्सिंग होमचे संचालक डॉ.तेजस राणे यांनी राबविला आहे.
जळगाव शहरातील नेरी नाका जवळ असलेल्या ४७ सरस्वती नगरातील मधुदत्त मेटरनिटी आणि नर्सिंग होम येथे डॉ.तेजस राणे यांनी मतदार जनजागृती अभियान राबवले गेले आहे. “मतदार राजा जागा हो, लोकशाहीचा धागा हो…” हे स्लोगन लावले गेले असून तसेच बोटाला शाई दाखवा आणि मोफत उपचार करून घ्या, अशी मोहीम त्यांनी हाती घेतली आहे. डॉ.तेजस राणे यांनी केलेल्या या उपक्रमाचे समाजातून कौतुक देखील होत आहे.
यावेळी डॉ. तेजस राणे म्हणाले कि, मतदान करण्यासाठी जाणाऱ्या प्रत्येक मतदारांनी घरून नाश्ता, जेवण करून बाहेर पडा, तसेच पाण्याची बाटली सोबत ठेवा. उन्हात जात असताना सोबत रुमाल किंवा टोपी वापरा.
टीप : दि.१३ मे २०२४ रोजी मतदानाचा हक्क बजावित असताना तुम्हाला जर उन्हाचा त्रास झाला तर तुम्ही त्याच दिवशी म्हणजे दि. १३ मे रोजी या हॉस्पिटलमध्ये येऊन ओपीडी मोफत मिळवू शकतात.