जळगाव मिरर | १० ऑक्टोबर २०२३
जगभरातील अनेक देशात शेती मोठ्या प्रमाणात केली जाते पण भारत हा कृषीप्रधान देश म्हणून ओळखला जात आहे. प्रत्येक देशात शेती ग्रामीण भागात मोठ्या प्रमाणात असून याचा फायदा देखील होत आहे. पुर्वीच्या लोकांच्या हाताला काम नसायचं तेव्हा ते शेतीवर आपला उदरनिर्वाह करायचे. आजच्या प्रगत तंत्रज्ञामुळे लोक आधुनिक पद्धतीने शेती करत आहेत, ज्याच ते लाखो-करोडो रुपये कमवतात. लोक विविध फळांची, फुलांची आणि भाज्यांची शेती करत आहेत. पण जगात असंही एक गाव आहे, जिथे चक्क सापांची शेती केली जाते, महत्त्वाचं म्हणजे यातून गावातील सर्व शेतकरी श्रीमंत बनले आहेत.
चीनमधील एका गावात सापांची शेती केली जाते. चीनच्या झेजियांग प्रांतातील जिसिकियाओ गावातील लोक साप पाळून आपला उदरनिर्वाह चालवतात. या गावातील प्रत्येक व्यक्ती याच व्यवसायावर अवलंबून आहे. या गावात लाखो विषारी साप पाळले जातात. या गावातील लोक किंग कोबरापासून ते अजगरासारखे साप पाळतात. या गावातील लोक सापांचं मांस आणि शरीराच्या अन्य भागांसाठी त्यांची शेती करतात. या गावातील सापांना अमेरिका, रशियासह कोरिया, जर्मनासारख्या अनेक देशांत मोठी मागणी आहे.
चीनमध्ये सापाचं मांस अतिशय आवडीने खाल्लं जातं. याशिवाय सापाचे अवयव औषध बनवण्यासाठीही वापरले जातात. तर अनेक प्रजातींचे साप पिशव्या, शूज आणि बेल्ट इत्यादी बनवण्यासाठी वापरले जातात. या गावात लाकूड आणि काचेच्या छोट्या पेटीत साप पाळले जातात. सापाची पिल्लं मोठी झाल्यावर त्यांना एका ठिकाणाहून दुसऱ्या ठिकाणी नेण्यासाठी प्लास्टिक पिशव्यांचा वापर केला जातो.