जळगाव मिरर | २३ जुलै २०२५
कामावरून घरी जात असलेल्या संजय सुपडू मालचे (वय ५०, रा. रामेश्वर कॉलनी) यांच्या डोक्यात दुचाकीवरील एका जणाने बीअरची बाटली मारून गंभीर दुखापत केली. याबाबत त्या इसमाने जाब विचारला असता त्यांच्या छातीत दगड मारला. ही घटना दि. २० जुलै रोजी रात्री बी.जे. मार्केट परिसरात घडली. याप्रकरणी जिल्हापेठ पोलिसात गुन्हा दाखल करण्या आला आहे.
सविस्तर वृत्त असे कि, शहरातील रामेश्वर कॉलनीत संजय मालचे हे वास्तव्यास असून ते एका हॉटेलमध्ये कामाला आहे. काम आटोपल्यानंतर रात्री पायी घरी जाण्यासाठी निघाले. बी. जे. मार्केटजवळ असताना एका दुचाकीवर तीन जण आले व त्यातील मागे बसलेल्याने मालचे यांच्या डोक्यात बीअरची बाटली मारली. यामध्ये मोठा रक्तस्त्राव होऊन ते रक्तबंबाळ झाले. त्यांनी मारण्याविषयी जाब विचारला असता त्यांच्या छातीत पुन्हा दगड मारण्यात आला. त्यानंतर अंधाराचा फायदा घेत तिघेही जण पळून गेले. या प्रकरणी संजय मालचे यांनी जिल्हापेठ पोलिस ठाण्यात फिर्याद दिली. त्यावरून अज्ञात तीन जणांविरुद्ध गुन्हा दाखल करण्यात आला आहे. पुढील तपास सपोनि संतोष चव्हाण करीत आहेत.
रात्री मद्यपान करून सुसाट वाहने चालविणाऱ्यांमुळे अपघाताचा धोका वाढला आहे. त्यात अनेक वेळा रात्री अशा वादाच्या, मारहाणीच्या घटना घडत असतात. पोलिसांनी रात्रीची गस्त वाढवावी, अशी मागणी नागरिकांकडून केली जात आहे.
