जळगाव मिरर | ८ एप्रिल २०२५
राज्यातील अनेक जिल्ह्यात गुन्हेगारी घटना सातत्याने घडत असतांना आता बीड जिल्ह्यनंतर छत्रपती संभाजीनगर जिल्हा हादरलं आहे. राज्यात विधानसभा निवडणूक लढवलेला संदीप शिरसाट आणि त्याच्यासोबतच्या दहा ते पंधरा जणांनी बिल्डर आणि त्याच्या साथीदाराचे अपहरण करून त्यास डांबून ठेवले. त्यास नग्न करून व पट्ट्याने मारहाण करून बंदुकीचा धाक दाखवत जिवे मारण्याची धमकी दिली. विशेष म्हणजे शिरसाट यांचा भाऊ पोलिस कर्मचारी असून तोदेखील यात सहभागी होता. रविवारी (६ एप्रिल) पहाटे सातारा परिसरात सुधाकरनगर भागात घडलेल्या या प्रकाराबाबत फिर्यादीने थेट पोलिस आयुक्तांकडे तक्रार करून बेगमपुरा पोलिस ठाण्यात गुन्हा दाखल केला. त्यानंतर गुन्हा सातारा पोलिस ठाण्यात वर्ग करण्यात आला आहे. यात १० ते १५ जणांवर गुन्हा दाखल करण्यात आला असून संदीप शिरसाट यास अटक करण्यात आली आहे.
विधानसभेची निवडणूक लढवणारा संदीप शिरसाट व त्यांच्या साथीदारांनी शरद राठोड नामक बिल्डराला अपहरण करून अमानुष मारहाण केल्याची घटना घडली आहे. राठोड यांच्या सहकाऱ्याला या टोळीने मारले. या घटनेमुळे छत्रपती संभाजीनगरातील गुंडगिरीचा धुमाकूळ समोर आला आहे. मस्साजोग येथे सरपंच संतोष देशमुख प्रकरणाची आठवण करून देणाऱ्या या घटनेत राठोड यांना अर्धा ते पाऊण राॅड, केबल, पट्टा, लाथा बुक्क्यांनी मारहाण केली. आरोपींना जिल्हा व सत्र न्यायालयात हजर केले असता ५ दिवसांची कोठडी सुनावली. पोलिस पुत्र संदीप भाऊसाहेब शिरसाट (रा. सुधाकरनगर), त्याचा भाऊ पोलिस कर्मचारी मिथुन शिरसाट, स्वप्निल गायकवाड, हर्षल, निखिलेश कांबळे अशी आरोपींची नावे आहेत.
शरद भवसिंग राठोड (३३, रा. कुमावतनगर, देवळाई चौक) हे बांधकाम व्यावसायिक असून त्यांनी पोलिसांकडे तक्रार दिली. त्यानुसार त्यांची अभिजित ऊर्फ बंटी बर्डे (२८) याच्याशी गेल्या ५ ते ६ वर्षांपासून मैत्री आहे. बंटी पूर्वी आरोपी शिरसाटकडे शासकीय बांधकामाच्या टेंडरमध्ये सहायक म्हणून काम करत होता. मात्र संदीपकडून सतत होणाऱ्या त्रासामुळे त्याने राठोड यांच्या कार्यालयात काम सुरू केले. ६ एप्रिलच्या पहाटे राठोड हॉटेलमधून जेवण करून निघत असताना शिरसाट, त्याचा पोलिस कर्मचारी असलेला भाऊ मिथुन, स्वप्निल गायकवाड, हर्षल आणि इतरांनी त्यांना ‘ऑफिसचे काम आहे’ असे सांगून गाडीत बसवून सुधाकरनगर येथील एका कार्यालयात नेऊन मारहाण केली. संदीपने राठोड यांच्या डोक्याला पिस्तूल लावून ‘तुला मारून डोंगरात फेकून देतो’ अशी धमकी दिली. यानंतर बर्डेला कॉल करून माझ्या दुचाकीचे पेट्रोल संपले आहे. तू लवकर ये असे सांगण्याचे संदीपने राठोडना फर्मावले.
