जळगाव मिरर | १७ एप्रिल २०२५
राज्यातील नागपूर-मुंबई समृद्धी महामार्गावर अपघाताची मालिका सुरूच असताना सिन्नर तालुक्यातील मलढोण शिवारात चॅनल नंबर 545 वर बुधवार (दि. 17) रोजी मध्यरात्री 1 वा च्या सुमारास झालेल्या अपघातात दोन्ही गाड्यांचे चालक जागीच ठार झाले असून गाडीत इतर प्रवासी नसल्याने अधिकचा अनर्थ टळला.
समृद्धी महामार्गावर मलढोण शिवारात बुधवार (दि. 17) रोजी मध्यरात्री झालेल्या भीषण अपघाताची माहिती समृद्धी महामार्गावरील वाहतूक नियंत्रण कक्षाचे अधिकारी मिलिंद सरवदे यांना मिळताच त्यांनी शिर्डी सिन्नर गोंदे येथील वाहतूक नियंत्रण कक्ष विभागशी संपर्क साधून घटनेची माहिती देत वावी पोलिसांनाही अपघाताची माहिती कळवली.
छत्रपती संभाजी नगर येथून बियरच्या बाटल्यांनी भरलेला मालट्रकचे टायर पंचर झाल्याने चालकाने मळढोण शिवारात रस्त्यावर ट्रक (क्र. MH – 20 cT 2932) उभा केला व पंक्चर काढण्याचे काम सुरु असताना त्याच वेळेत भरधाव वेगात नागपूर ते मुंबईकडे जाणारा जिओ कंपनीचा रिकामा असलेला पेट्रोल टॅंकर (mH 29 BE 2519) उभ्या असलेल्या बियरच्या ट्रकवर जाऊन आदळल्याने भीषण अपघात घडला. यामध्ये ट्रकचालक (नाव समजू शकले नाही) ठार झाला. मागून भरधाव वेगात येणाऱ्या जिओ कंपनीचा पेट्रोल ट्रकचालक विजेंद्र मनी तिवारी हे अपघातात मयत झाले आहेत.
