जळगाव मिरर | ९ फेब्रुवारी २०२६
दिनांक ०८/०२/२०२६ रोजी आनंद मोर्या, रा.अयोध्या, झेलम एक्सप्रेसने प्रवास करत असताना, जळगाव ते भुसावळ दरम्यान त्यांची बॅग अज्ञात व्यक्तीने चोरी केली होती. या बॅगेत १,६५,०००/- रुपये किंमतीचे सोने व चांदीचे दागिने होते.
पोलिसांनी दिलेल्या माहितीनुसार, सदर प्रकरणाची तक्रार आनंद मोर्यांनी इटारसी रेल्वे पोलीसात दाखल केली होती, जी भुसावळ रेल्वे पोलीस स्टेशनकडे वर्ग करण्यात आली. पुढील तपासात जळगाव येथील रेकॉर्डवरील आरोपी समीर शेख फिरोज उर्फ गोल्डन (रा. फातेमा नगर, अल्फरा मशीद जवळ, वय २१) आणि त्याचा साथीदार सोनु जयसिंग बागडे (रा. जाखनी नगर, कंजरवाडा, जळगाव) या दोघांनी हा गुन्हा केले असल्याचे खात्रीस पडले.
वरीष्ठ पोलीस निरीक्षक श्री. राहुल गायकवाड यांच्या मार्गदर्शनाखाली स्थानिक गुन्हे शाखेने गुप्तबातमीदारा व पोलीस पथकाच्या सहाय्याने समीर शेख याला ताब्यात घेतले. तपासात त्याने गुन्हा करण्यास आपल्या साथीदारासह सहमती दर्शवली. साथीदाराचा शोध सुरू आहे.
सदर कारवाई पोलीस अधीक्षक जळगाव मा. डॉ. श्री. महेश्वर रेड्डी, अपर पोलीस अधीक्षक श्री. अशोक नखाते आणि स्थानिक गुन्हे शाखेचे अधिकारी यांचे मार्गदर्शनाखाली करण्यात आली. यामध्ये पोलीस उपनिरीक्षक शरद बागल, अंमलदार अतुल वंजारी, अकरम शेख, विजय पाटील, नितीन बाविस्कर, किशोर पाटील, रविंद्र कापडणे यांची कार्यवाही होती.
