जळगाव मिरर । २४ सप्टेंबर २०२५
मावशीकडे आलेल्या तरुणाला भरधाव वाहनाने धडक दिली. या अपघातात गंभीर जखमी झालेल्या प्रेम उर्फ जयपाल चरणसिंग पाटील (वय १८, रा. लोंढरी, ता. जामनेर, ह.मु. वाळूज, छत्रपती संभाजी नगर) याचा उपचार सुरु असतांना मृत्यू झाला. ही घटना दि. २३ रोजी सकाळी साडेदहा वाजेच्या सुमारास सुप्रिम कॉलनीजवळ घडली. धडक दिल्यानंतर वाहन चालक तेथून पसार झाला. या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, जामनेर तालुक्यातील लोंढरी येथील रहिवासी असलेला जयपाल पाटील हा आपल्या कुटुंबासह सध्या छत्रपती संभाजीनगर येथील एमआयडीसी वाळूज परिसरात वास्तव्यास होता. नुकताच तो बारावीची परिक्षा उत्तीर्ण होवून महाविद्यालयात शिक्षण घेत होता. काही दिवसांपूर्वी त्याच्या आजीचे निधन झाल्यामुळे, जयपाल त्याच्या आई-वडील आणि बहिणीसोबत सुप्रिम कॉलनीत राहणाऱ्या मावशीच्या घरी आला होता. मंगळवारी सकाळी साडेदहा वाजेच्या सुमारास तो आपल्या दुचाकीत पेट्रोल भरण्यासाठी घराबाहेर पडला. सुप्रीम कॉलनीजवळच्या राष्ट्रीय महामार्गावर पोहोचताच, एका अज्ञात वाहनाने त्याच्या दुचाकीला जोरदार धडक दिली.
भरधाव वाहनाने दिलेले धडक इतकी जोरात होती की, या अपघातात तरुण गंभीर जखमी झाला होता. त्याला तात्काळ उपचारार्थ जिल्हा शासकीय वैद्यकीय महाविद्यालयात दाखल केले.
याठिकाणी त्याच्यावर उपचार सुरु असतांना दुपारी दोन वाजेच्या सुमारास त्याची प्राणज्योत मालवली. प्रेम उर्फ जयपाल पाटील हा कुटुंबातील एकुलता एक मुलगा होता. अपघातात त्याचा दुर्देवी मृत्यू झाल्यामुळे पाटील कुटुंबियांवर दुःखाचा डोंगर कोसळला आहे. वृद्धापकाळात आईवडीलांचा आधार ठरणारा मुलाचा मृत्यू झाल्याचे समजाताच त्यांनी जिल्हा रुग्णालयात हंबरडा फोडीत आक्रोश केला. या प्रकरणी पोलिसात अकस्मात मृत्यूची नोंद करण्यात आली.
