जळगाव मिरर | २० नोव्हेबर २०२३
राज्यात प्रेम प्रकरणातून व पती-पत्नीतील संशयातून अनेक शहरात खून आत्महत्याच्या घटना घडत असतांना एक धक्कादायक घटना नाशिक जिल्ह्यातून समोर आली आहे. पतीला प्रेमसंबंधाबाबत विचारणा केल्याचा राग मनात धरून पत्नीचा खून करण्यात आला. यात रूपाली ज्ञानदेव आमटे (वय २४) असे खून करण्यात आलेल्या महिलेचे नाव असून विशेष म्हणजे या घटनेबाबत पतीने पुरावा नष्ट करण्याचा बनाव केला होता. हा बनाव पोलिसांनी उघडकीस आणला आहे. ही घटना श्रीगोंदा तालुक्यातील पारगाव सुद्रिक याठिकाणी घडली आहे.
पोलिसांनी दिलेल्या माहितीनुसार, श्रीगोंदा पोलीस ठाण्यात मयत महिलेचा भाऊ रोहित मडके (रा. फक्राबाद, ता. जामखेड) यांच्या फिर्यादीवरून संशयित ज्ञानदेव आमटे याच्याविरोधात गुन्हा दाखल करण्यात आला आहे. संशयिताचे एका महिलेशी अनैतिक संबंध असल्याचा संशय त्याच्या पत्नीला आल्याने तिने पतीला विचारणा केली. याचा राग येऊन संशयिताने दि. १० नोव्हेंबर रोजी घराच्या शेजारी मोठा खड्डा तयार करून पत्नीची क्रूर हत्या केली व पुरावा नाहीसा करण्याच्या उद्देशाने पत्नीचा मृतदेह कपड्यामध्ये बांधून घराच्या बाजूला अगोदरच खोदलेल्या खड्ड्यात पुरून टाकला. हे कृत्य कोणाच्या लक्षात येऊ नये, यासाठी पत्नीला श्रीगोंदा येथे पार्लरसाठी नेऊन सोडले, परंतु ती घरी माघारी आली नसल्याचे तिच्या माहेरच्यांना सांगत श्रीगोंदा पोलीस ठाण्यात पत्नी हरविल्याची तक्रार दिली,
संशयिताने मयत महिलेच्या भावाला सोबत घेऊन परिसरात शोध घेतला. मात्र महिला मिळून न आल्याने मयत महिलेच्या भावाला तिच्या पतीवर संशय आल्याने त्याने परिसरातील सीसीटीव्ही तपासले. त्यात संशयित आणि त्याची पत्नी दोघेही श्रीगोंदा येथे गेले नसल्याचे लक्षात येताच त्याने आरोपीच्या घराच्या परिसरात शोध घेतला. तेथे नुकताच बुजविलेला खड्डा खोदताच दुर्गंधी आल्याने त्याने पोलिसांना माहिती दिली.
उपविभागीय पोलीस अधिकारी विवेकानंद वाखारे, पोलीस निरीक्षक ज्ञानेश्वर भोसले, तहसीलदार हेमंत ढोकले, पोलीस उपनिरीक्षक समीर अभंग यांनी घटनास्थळी जाऊन पंचासह पाहणी करत खड्डा खोदला. यावेळी कपड्यात बांधलेला महिलेचा मृतदेह आढळून आला. यावरून महिलेचा खून झाल्याचे निष्पन्न झाल्याने पोलिसांनी गुन्हा दाखल केला. मात्र गुन्हा दाखल होत असल्याचे समजताच आरोपीने मोबाइल बंद करून पलायन केले. आरोपीच्या शोधार्थ पथके पाठविल्याची माहिती पोलीस निरीक्षक ज्ञानेश्वर भोसले यांनी दिली.
