जळगाव मिरर | १८ मार्च २०२६
जिल्हा पोलिस दलाच्या वेल्फेअर विभागांतर्गत चालविण्यात येणाऱ्या दक्षता पेट्रोल पंपावरील कोट्यवधींच्या अपहार प्रकरणात अटकेत असलेले व्यवस्थापक उपनिरीक्षक वाल्मीक मधुकर वाघ आणि त्यांचा मुलगा शेखर वाघ यांची पोलीस कोठडी संपल्यानंतर मंगळवारी त्यांना न्यायालयात हजर करण्यात आले. यावेळी न्यायालयाने दोघा पिता-पुत्रांना न्यायालयीन कोठडीत पाठवण्याचे आदेश दिले असून त्यांची रवानगी जळगाव कारागृहात करण्यात आली आहे.
मिळालेल्या माहितीनुसार, जिल्हा पोलीस दलाच्या वेल्फेअर विभागामार्फत चालविण्यात येणाऱ्या दक्षता पेट्रोल पंपावर व्यवस्थापक म्हणून कार्यरत असलेले उपनिरीक्षक वाल्मीक वाघ यांनी तब्बल १ कोटी ३३ लाख ७५२ रुपयांचा अपहार केल्याचे उघड झाले होते. या गंभीर आर्थिक गैरव्यवहार प्रकरणात पोलिसांनी तत्काळ कारवाई करत वाल्मीक वाघ आणि त्यांचा मुलगा शेखर वाघ या दोघांना अटक केली.
तपासादरम्यान वाघ यांच्या निवासस्थानी झाडाझडती घेण्यात आली असता, सुमारे १२ लाख ७३ हजार रुपयांची रोख रक्कम जप्त करण्यात आली. या कारवाईमुळे प्रकरणातील आर्थिक गैरव्यवहाराचे गांभीर्य अधोरेखित झाले आहे. दरम्यान, अटकेनंतर दोघांना पोलीस कोठडीत ठेवण्यात आले होते. मंगळवारी त्यांची पोलीस कोठडी संपल्यानंतर त्यांना न्यायालयात हजर करण्यात आले. न्यायालयाने या प्रकरणाचे स्वरूप लक्षात घेऊन दोघांची न्यायालयीन कोठडी सुनावली.
या प्रकरणाचा पुढील तपास सुरू असून, अपहारातील उर्वरित रकमेचा मागोवा घेणे, तसेच या प्रकरणात इतर कोणी सहभागी आहे का याचा तपास पोलिसांकडून केला जात आहे. जिल्ह्यात या प्रकरणाची मोठी चर्चा असून, पोलिस दलातीलच अधिकाऱ्याने केलेल्या अपहारामुळे खळबळ उडाली आहे.
