जळगाव मिरर | १ ऑक्टोंबर २०२३
पत्नीचा अपघात झाल्यामुळे उपचार सुरू असताना तिचा मृत्यू झाल्यानंतर मध्यप्रदेशातील बऱ्हाणपूर जिल्ह्यातील बोदर्डी येथील राजू सोनसिंग राठोड (वय ३५) या तरुणाने रेल्वे समोर आत्महत्या केली. ही घटना २९ सप्टेंबर रोजी भादली ते भुसावळ रेल्वे मार्गावर घडली. याप्रकरणी नशिराबाद पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, दि.२९ सप्टेंबर शुक्रवार रोजी दुपारी ३ वाजेच्या सुमारास भादली ते भुसावळ दरम्यान डाऊन रेल्वेमार्गावरील खांबा क्रमांक ४३५/५ ते ४३५/७मध्ये अंदाजे ३० ते ३५ वर्षीय अनोळखी तरुणाचा मृतदेह पडलेला होता. या संदर्भात भादली रेल्वे स्टेशन प्रबंधकांनी नशिराबाद पोलिसांना माहिती दिली. त्यानुसार पोलिसांनी घटनास्थळी जाऊन पंचनामा केला व मृतदेह शासकीय वैद्यकीय महाविद्यालय व रुग्णालयात हलविला. या प्रकरणी तपास सुरू असताना समजले की, राजू राठोडची पत्नी संगीता राजू राठोड (३०) यांचा रावेरजवळ अपघात झाला होता. उपचार सुरू असताना त्यांचा मृत्यू झाला. त्याचा धक्का सहन न झाल्याने राजू यांनीदेखील रेल्वेसमोर झोकून देत आत्महत्या केली. या प्रकरणी नशिराबाद पोलिस ठाण्यात अकस्मात मृत्यूची नोंद करण्यात आली आहे. पुढील तपास पोहेकॉ अतुल महाजन करीत आहेत.
