जळगाव मिरर / ३ मे २०२३ ।
प्रत्येक व्यक्ती आपल्या लग्नाची आठवण म्हणून सध्या प्री वेडिंग फोटोशूटची मोठी धमाल सुरु आहे. प्रत्येक घरातील नवे जोडपे याला पसंती देखील देत आहेत. प्री वेडिंग नंतर पोस्ट वेडिंग त्यानंतर प्री बेबी फोटोशूट हे सगळे प्रकार अगदी आनंदाने लोक करतात. पण तुम्ही कधी घटस्फोटाचे फोटोशूट पाहिले आहे का? चेन्नईत राहणाऱ्या एका महिलेने आपल्या घटस्फोटाचे फोटोशूट केले आहे. आपल्या पतीपासून विभक्त झाल्यानंतर त्याचे दु:ख करत बसण्यापेक्षा या गोष्टीकडे सकारात्मक दृष्टीने पाहून हटके अंदाजात या महिलेने घटस्फोटाचे फोटोशूट केले आहे.
शालिनीने आपल्या इंस्टाग्राम अकाऊंटवरुन तिच्या घटस्फोटाच्या फोटोशूटचे फोटो शेअर केले आहेत. पहिल्या फोटोत, शालिनीने तिच्या हातात “डायव्होर्सड’ अक्षरे हायलाइट करत फोटो काढले आहेत. दुसऱ्या फोटोत शालिनी स्वतःचा आणि पतीचा एकत्र फोटो फाडताना दिसत आहे. याशिवाय तिसऱ्या फोटोत शालिनी तिची आणि तिच्या पतीची फोटो फ्रेम पायाने चिरडताना दिसत आहे.
घटस्फोटानंतर भारतीय स्त्रिया भावनिकदृष्ट्‌या तुटतात आणि नैराश्‍यात जातात. पतीपासून विभक्त झाल्यानंतर तिला सामान्य जीवनात परत येण्यासाठी थोडा वेळ लागतो. पण ही जुनी विचारसरणी मोडीत काढण्यासाठी शालिनीने पुढाकार घेत भारतात नव्या मोहिमेला चालना दिली आहे.
“घटस्फोटित महिलेचा संदेश त्या लोकांसाठी ज्यांना चांगले विचार पटत नाहीत, ज्या लग्नाचा तुम्हांला त्रास होतो त्या लग्नातून मुक्त होणे गरजेचे आहे कारण तुम्ही आनंदी राहण्याचा तुम्हाला हक्क आहे आणि कधीही तडजोड करू नका, तुमच्या जीवनावर नियंत्रण ठेवा आणि स्वतःचे आणि तुमच्या मुलांचे चांगले भविष्य घडवण्यासाठी आवश्‍यक बदल करा,’ असे इंस्टाग्रामवरून हे फोट शेअर करत शालिनीने म्हटले आहे. शालिनीने पुढे म्हटले की, “घटस्फोट म्हणजे अपयश नाही! तुमच्यासाठी आणि तुमच्या आयुष्यात सकारात्मक बदल घडवून आणण्यासाठी हा एक टर्निंग पॉइंट आहे. लग्न सोडून एकटे उभे राहण्यासाठी खूप धैर्य लागते, म्हणून मी हे माझ्या सर्व धाडसी महिलांना समर्पित करते.’
