जळगाव मिरर | २४ ऑक्टोबर २०२३
खासगी वित्तीय संस्थेकडून घेतलेल्या कर्जाचा हप्ता न भरल्याने तो वसूल करण्यावरून संजय पुरण राठोड यांना आठ जणांनी शिवीगाळ करीत मारहाण केली ही घटना शनिवारी जळगाव तालुक्यातील रामदेववाडी येथे घडली. याप्रकरणी एमआयडीसी पोलिस ठाण्यात रविवारी आठ जणांविरुद्ध गुन्हा दाखल करण्यात आला आहे.
मिळालेल्या माहितीनुसार, येथील संजय राठोड यांनी काही दिवसांपूर्वी एका खासगी वित्तीय संस्थेकडून कर्ज घेतले होते. या कर्जाचा हप्ता थकल्याने त्यांच्याकडे एक जण आला. त्या वेळी पैसे नसल्याने संध्याकाळपर्यंत पैशाची तजवीज करतो, असे राठोड यांनी सांगितले. त्यावरून दोघांमध्ये वाद झाला व वसुलीसाठी आलेल्या व्यक्तीने फोन करून इतर मंडळींना बोलविले. त्यावेळी तेथे आठ ते दहा जण आले. त्याठिकाणी वसुली करण्याच्या कारणावरून आशिष गौतम तायडे (वय २४), ऋषिकेश घुगे (वय २२), महेंद्र पांडुरंग पाटील (वय २६), मनोज आधार सोनवणे (वय २२), आकाश विजय बोराडे (वय २४), संदीप विक्रम सावंत (वय ३३), संदीप ताराचंद पाटील (वय २९), कल्पेश सोनवणे (वय २५, सर्व रा. जळगाव) यांनी राठोड यांना बेदम मारहाण करून दमदाटी केली. हा प्रकार घडल्यानंतर जखमी झालेल्या अरुण राठोड याने रविवारी रात्री उशिरा एमआयडीसी पोलीस ठाण्यात धाव देऊन तक्रार दिली आहे. त्यानुसार एमआयडीसी पोलीस ठाण्यात ८ जणांविरोधात गुन्हा दाखल करण्यात आला आहे. पुढील तपास पोलीस हेड कॉन्स्टेबल प्रदीप पाटील करत आहे.