अमळनेर : विक्की उत्तम जाधव
अमळनेर शहरातील एका परिसरात घरगुती वापराचा गॅस खासगी वाहनात भरण्यासाठी काळ्या बाजारात विक्री करताना एक एचपी कंपनीची गाडी ३० सिलिंडरसह पोलिसांनी रंगेहाथ पकडून तिघांवर जीवनावश्यक वस्तू कायद्याप्रमाणे गुन्हा दाखल करण्यात आला आहे.
मिळालेल्या माहितीनुसार, शहरातील मिळचाळ भागात शाळा नंबर १० जवळ घरगुती वापराची गॅस सिलिंडरची गाडी काळ्या बाजारात विक्रीसाठी येणार असल्याची माहिती डीवायएसपी सुनील नंदवाळकर याना मिळाल्यावरून पोलीस उपनिरीक्षक विलास पाटील, हितेश बेहरे, भटूसिंग तोमर, मेघराज महाजन, गणेश पाटील याना पाठवले. दुपारी दीड वाजेच्या सुमारास त्याठिकाणी एचपी कंपनीच्या गाडीतून सिलिंडर उतरवले जात होते. पोलिसांनी छापा मारून फारुख जहूर शेख (४८, प्रतापनगर गलवाडे रोड), चालक प्रमोद पाटील (४१, सप्तशृंगी कॉलनी, अमळनेर) व मदतनीस अनिल शिंदे (५२, तांबेपुरा) अशा तिघांना ताब्यात घेतले. पोलिसांनी ३ लाख ५७ हजार ३०० रुपयांचा मुद्देमाल जप्त केला आहे.