जळगाव मिरर | १९ फेब्रुवारी २०२६
पॅजो रिक्षाचा धक्का लागल्याच्या कारणावरुन तिघांनी मुन्ना रमजान पिंजारी (वय ३६, रा. बिलाल चौक, तांबापुरा) याला मारहाण करीत त्याच्या पार्श्वभागावर धारदार चॉपरने वार केले. तसेच त्याच्या रिक्षाची तोडफोड करीत नुकसान केले. ही घटना दि. १६ रोजी सायंकाळी ८ वाजता नेरी नाका परिसरात घडली. याप्रकरणी तिघांविरुद्ध एमआयडीसी पोलिसात गुन्हा दाखल करण्यात आला आहे.
मिळालेल्या माहितीनुसार, शहरातील तांबापुरा परिसरातील बिलाल चौकात मुन्ना पिंजारी यांच्याकडे पॅजो रिक्षा आहे. दि. १६ रोजी (एमएच १९, एस, २३८८) क्रमांकाच्या अॅपे रिक्षातून पाण्याचे जार वाटून ते सायंकाळी साडेसात वाजेच्या सुमारास नेरीनाका परिसरातून घरी जात होते. यावेळी त्याठिकाणाहून जाणाऱ्या तिघांना रिक्षाचा धक्का लागला. त्या तिघांनी पिंजारी यांच्यासोबत वाद घालण्यास सुरुवात केली. यावेळी तिघ अज्ञात हल्लेखोरांनी पिंजारी यांच्या रिक्षाची काच फोडून नुकसान केले.
वाद घाणाऱ्यांपैकी एकाने माझे नाव शुभम असून मी कासमवाडीचा दादा आहे. असे म्हणत त्याच्याजवळ असलेल्या धारदार चॉपरने मुन्ना पिंजारी यांच्या पार्श्वभागावर वार केले. तसेच त्यांना जीवेठार मारण्याची धमकी देत ते पसार झाले. धारदार चॉपरने वार केल्यामुळे गंभीर जखमी झालेल्या मुन्ना पिंजारी यांना तात्काळ जिल्हा रुग्णालयात दाखल करण्यात आले. याठिकाणी त्यांनी उपचार घेतल्यानतर दि. १७ रोजी एमआयडीसी पोलीस ठाण्यात तक्रार दिली. त्यानुसार तिघांविरुद्ध गुन्हा दाखल करण्यात आला आहे. तपास पोहेकॉ प्रमोद लाडवंजारी हे करीत आहे.
