जळगाव मिरर | ५ फेब्रुवारी २०२६
महाराष्ट्र नवनिर्माण सेनेचे अध्यक्ष राज ठाकरे यांच्या धडाकेबाज नेतृत्वावर आणि ‘राज’कारणावर विश्वास ठेवून जळगावातील सुप्रीम कॉलनी परिसरातील अनेक मुस्लिम तरुणांनी आज ‘मनसे’चा झेंडा हाती घेतला. मनसे जिल्हाध्यक्ष ॲड. जमील देशपांडे यांच्या प्रमुख उपस्थितीत हा प्रवेश सोहळा पार पडला. यावेळी पक्षाची ध्येयधोरणे जनसामान्यांपर्यंत पोहोचवण्यासाठी युसुफ जाकीर खाटीक यांची सुप्रीम कॉलनी परिसर शाखाध्यक्षपदी नियुक्ती करण्यात आली.
या सोहळ्याला मनसे उपशहराध्यक्ष श्रीकृष्ण मेंगडे, ललित शर्मा, राजेंद्र निकम, प्रकाश जोशी, विद्यार्थी सेनेचे जिल्हाध्यक्ष कल्पेश पवार, उमेश आठरे यांसह पक्षाचे अन्य पदाधिकारी व कार्यकर्ते मोठ्या संख्येने उपस्थित होते.
पक्षात प्रवेश करणाऱ्यांमध्ये प्रामुख्याने अशपाक शहा, बादशहा महमूद शहा, आली खाटीक, साहिल शेख, इमरान शहा, जुबेर खाटीक, शोएब खाटीक यांच्यासह अनेक तरुणांचा समावेश आहे. जिल्हाध्यक्षांनी या सर्व नवनियुक्त कार्यकर्त्यांचे स्वागत करून त्यांना पुढील वाटचालीस शुभेच्छा दिल्या. येत्या काही दिवसांत सुप्रीम कॉलनी परिसरात मनसेच्या भव्य शाखेचे उद्घाटन केले जाणार आहे. राजसाहेबांच्या विचाराने प्रेरित होऊन शेकडो मुस्लिम तरुण मनसेमध्ये प्रवेश करण्यास उत्सुक आहेत.
या प्रवेशामुळे जळगाव शहरात मनसेची ताकद वाढली असून, आगामी काळात सुप्रीम कॉलनी परिसरात पक्षाचे कार्य अधिक जोमाने विस्तारणार असल्याची माहिती नवनिर्वाचित शाखा अध्यक्ष युसुफ खाटीक यांनी दिली आहे.
