जळगाव मिरर । २७ सप्टेंबर २०२५
तालुक्यातील आव्हाणा गावाजवळील ऑक्सफर्ड इंग्लिश मीडियम स्कूल परिसरात एका भरधाव दुचाकीने समोरून येणाऱ्या दुचाकीला जोरदार धडक दिल्याने झालेल्या अपघातात पती-पत्नी जखमी झाल्याची घटना घडली आहे. हा अपघात २१ सप्टेंबर रोजी सकाळी १० वाजेच्या सुमारास घडला होता. या संदर्भात, जखमी महिलेने दिलेल्या फिर्यादीनुसार, घटनेच्या चार दिवसांनंतर २५ सप्टेंबर रोजी दुपारी साडेबारा वाजता जळगाव तालुका पोलीस ठाण्यात अज्ञात दुचाकी चालकावर गुन्हा दाखल करण्यात आला आहे.
सविस्तर वृत्त असे कि, तालुक्यातील कानळदा येथील रहिवासी असलेल्या संध्या विशाल सोनवणे (वय ३२) या त्यांच्या पतीसोबत म्हणजेच विशाल सोनवणे यांच्यासोबत त्यांच्या दुचाकीवरून जात होत्या. त्या आव्हाना गावाजवळील ऑक्सफर्ड इंग्लिश मीडियम स्कूलजवळून प्रवास करत असताना, समोरून एमएच १९ एम ०५९५ क्रमांकाची दुचाकी भरधाव वेगाने येत होती. या दुचाकीच्या चालकाने सोनवणे दांपत्याच्या दुचाकीला जोराची धडक दिली. यात दोघेही गंभीर जखमी झाले. तसेच, त्यांच्या दुचाकीचेही मोठे नुकसान झाले आहे. अपघातानंतर लगेचच नागरिकांनी जखमींना मदत करत उपचारासाठी रुग्णालयात दाखल केले.
अपघात झाल्यानंतर, धडक देणारा दुचाकी चालक घटनास्थळावरून पसार झाला. अज्ञात दुचाकी चालकाविरुद्ध गुन्हा नोंदवण्यात आला आहे. या घटनेचा पुढील तपास पोलीस हेडकॉन्स्टेबल रामकृष्ण इंगळे हे करत आहेत.
