जळगाव मिरर | संदीप महाले
”सद्रक्षणाय खलनिग्रहणाय” हे महाराष्ट्र पोलिसांचे ब्रीदवाक्य असून याचा अर्थ असा की, महाराष्ट्र पोलीस सज्जनांचे रक्षण करण्यास आणि दुर्जनांवर नियंत्रण ठेवून त्यांचा नायनाट करण्यास कटीबद्ध आहे. मात्र जळगाव जिल्ह्यात या ब्रीद वाक्याला फाटा काही पोलिसांनी दिल्याने जिल्ह्यातील पोलीस विभागाची वर्दी डागाळत असल्याची चर्चा जिल्ह्यात सुरु झाली आहे. वर्दीवर लागलेला डाग पुसून काढण्यासाठी जळगाव जिल्हा पोलीस अधीक्षकांना अॅक्शन मोडवर येवून कारवाईचा बडगा उचलण्याची गरज आहे.
जळगाव जिल्ह्यात गेल्या काही महिन्यापासून लाचखोरी, खंडणी, ड्रग्स प्रकरणामुळे राज्यात चर्चिला जात आहे. दोन महिन्यापूर्वी जळगाव गुन्हे शाखेतील दोन कर्मचारी गुटखाची कारवाई रोखण्यासाठी पैसे घेत असल्याचा व्हिडीओ व्हायरल झाल्यावर दोन कर्मचाऱ्यांची उचलबांगडी केली होती ती घटना होत नाही तोच गुन्हे शाखेतील पोलीस उपनिरीक्षकाने एका फरार आरोपीशी तब्बल ३०० पेक्षा जास्त वेळा फोनवर बोलल्याचा ठपका ठेवत त्या पोलीसावर कारवाई करण्यात आली होती, यामुळे जळगाव जिल्हा पोलीस राज्यभरात चांगलाच चर्चेत आला होता. तर जळगाव शहर पोलीस स्थानकातील दोन कर्मचाऱ्यांनी लाच घेतल्याची घटना घडल्यानंतर त्या कर्मचाऱ्यांवर देखील कारवाई करण्यात आली होती. तोच आता चाळीसगाव शहरात अत्याचाराच्या गुन्ह्यात निरापराध व्यक्तीला अडकवित तब्बल १ लाख २० हजारांची खंडणी पोलिसाने घेतल्याने जिल्ह्यात मोठी खळबळ उडाली होती. जर सर्व सामान्य जनता ज्या पोलिसांवर विश्वास ठेवून सुरक्षित आहे. तेच पोलीस भक्षक झाले तर सर्व सामान्य जनता विश्वास ठेवणार कुणावर जर पोलीस कर्मचारीच जर गुन्हेगारासोबत गुन्हे करायला लागली तर जनता न्यायाची अपेक्षा ठेवणार कुणावर यावर जळगाव जिल्हा पोलीस अधीक्षकांनी पोलीस विभागात सखोल जावून चौकशी केली तर आणखी पोलीस कर्मचारी अशा प्रकारच्या खंडणी व लाचखोरीत समोर येवू शकतात. यावर देखील पोलीस अधीक्षकांनी कारवाई करणे अपेक्षित आहे.
शहरातील तरुणाई ड्रग्सच्या विळख्यात ?
जळगाव शहराचे आ.राजूमामा भोळे यांनी गेल्या काही महिन्यापूर्वीच जिल्हा नियोजन बैठकीत शहरात सुरु असलेल्या ड्रग्स प्रकरणाबाबत जिल्हा पोलीस दलावर नाराजी व्यक्त केली होती. तरी देखील कारवाई झालेली नाही जर शहराचे आमदार यावर बोलत आहे त्यावर कठोर कारवाई होणे गरजेचे होते, यामुळे शहरातील तरुणाई ड्रग्सच्या विळख्यात अडकत आहे का ? असा देखील सवाल उपस्थित होत आहे.
