जळगाव मिरर । १ ऑगस्ट २०२३
जळगाव जिल्ह्यात शासकीय विभागात लाचखोरांचे प्रमाण दिवसेंदिवस वाढत चाललेले दिसून येत आहे. या लाचखोरांना पकडण्यासाठी जळगाव एसीबी सापळा लावून अशा लाचखोराना शासन करीत असून आज देखील महसूल विभागातील एका लिपिकाने १ हजाराची लाच घेतल्याने जिल्ह्यातील महसूल विभागात मोठी खळबळ उडाली आहे. हि कारवाई बोदवड तहसील कार्यालयात झाली आहे.
मिळालेल्या माहितीनुसार , बोदवड तहसील कार्यालयात रेशन कार्ड वर आईचे व मुलाचे नाव कमी करण्यासाठी व नवीन रेशन कार्ड तयार करून देण्यासाठी एक हजारांची लाच मागून ती स्वीकारल्याने तहसील कार्यालयातील पुरवठा विभागाचा लिपिक उमेश बळीराम दाते, (55, बोदवड) यास जळगाव एसीबीच्या पथकाने कार्यालयातच रंगेहाथ अटक केल्याने महसूल विभागात मोठी खळबळ उडाली आहे. पोलीस उपअधीक्षक सुहास देशमुख यांच्या नेतृत्वात पोलीस निरीक्षक अमोल वालझाडे, एएसआय दिनेशसिंग पाटील, बाळू मराठे, कॉन्स्टेबल राकेश दुसाने आदींच्या पथकाने हा सापळा यशस्वी केला.
