जळगाव मिरर | २ सप्टेंबर २०२६
रक्षाबंधनानिमित्त कुटुंबीयांसह मूळ गावी गेलेल्या वकिलाच्या बंद घरावर अज्ञात चोरट्यांनी डल्ला मारत तब्बल २ लाख ६२ हजार ५०० रुपयांचे जवळपास १०.५ तोळे सोन्याचे दागिने लंपास केल्याची धक्कादायक घटना चाळीसगाव शहरातील शिवाजीनगर परिसरात उघडकीस आली.
विशेष म्हणजे चोरट्यांनी घरात प्रवेश केल्यानंतर सीसीटीव्हीच्या वायरी कापून पुरावे नष्ट करण्याचा प्रयत्न केला. मात्र, काही फुटेजमध्ये तीन संशयित चोरटे कैद झाले आहेत. या संदर्भात अॅड. नितीन सुरेश पाटील (वय ४२) यांनी चाळीसगाव शहर पोलिस ठाण्यात फिर्याद दाखल केली आहे. पोलिसांत दिलेल्या फिर्यादीनुसार, नितीन पाटील हे पत्नी शुभांगी, मुलगा अथर्व व मुलगी त्रीशा यांच्यासह शिवाजीनगर परिसरात राहत असून चाळीसगाव न्यायालयात ते वकिली करतात. दरम्यान, नितीन पाटील यांच्या घरातील बेडरूममधील लाकडी कपाटाच्या लॉकरमध्ये सोन्याचे दागिने ठेवलेले होते. २७ ऑगस्टला सायंकाळी ६.३० वाजेच्या सुमारास रक्षाबंधनासाठी पाटील कुटुंबीय घराला कुलूप लावून त्यांच्या मूळ गावी गेले होते. रक्षाबंधन आटोपल्यानंतर ते ३० ऑगस्टला रात्री ११ वाजता चाळीसगावातील घरी परतले. त्यावेळी घराच्या मुख्य दरवाजाचे कुलूप तोडण्याचा प्रयत्न झाल्याचे त्यांच्या निदर्शनास आले.
घरात प्रवेश केल्यानंतर त्यांना साहित्य अस्ताव्यस्त पडलेले होते. घराच्या आतील दरवाजाचा कडी-कोयंडा तोडलेला होता. बेडरूममधील लाकडी कपाटाचे लॉक तोडून लॉकरमध्ये ठेवलेले सोन्याचे दागिने चोरुन नेल्याचे आढळले. तर, अॅड. पाटील यांनी तत्काळ घरातील सीसीटीव्ही फुटेज तपासले असता तीन पुरुष चोरटे कॅमेऱ्यात दिसून आले. तसेच चोरट्यांनी सीसीटीव्हीच्या वायरही कापल्याचे आढळले. हे फुटेज त्यांनी सुरक्षित ठेवले आहे. तर, घटनेची माहिती मिळताच मित्र व शेजाऱ्यांनी घटनास्थळी धाव घेतली. पोलिसांना माहिती दिल्यानंतर पथक घटनास्थळी दाखल झाले. त्यानंतर श्वान पथक व ठसे तज्ज्ञांचे पथक घटनास्थळी दाखल झाले, त्यांनी तपासासाठी पुरावे संकलित केलेत. याप्रकरणी अज्ञात चोरट्यांविरुद्ध चाळीसगाव शहर पोलिस ठाण्यात गुन्हा दाखल करण्यात आला आहे.
चोरट्यांनी ८७ हजार ५०० रुपयांची ३५ ग्रॅमची सोन्याची मंगलपोत, १ लाख ३० हजाराचा ५२ ग्रॅमचा सोन्याचा राणीहार, १५ हजारांची ६ ग्रॅमची सोन्याची अंगठी, २५ हजारांचा १० गॅमचा सोन्याचा वेढा, ५ हजारांची प्रत्येकी १ गॅमचे सोन्याची दोन बिस्किटे असा एकूण २ लाख ६२ हजार ५०० रुपयांचा सोन्याचा ऐवज चोरल्याचे फिर्यादीत नमूद केले आहे.
