जळगाव मिरर | २० सप्टेंबर २०२५
कर्जत-जामखेडचे राष्ट्रवादी काँग्रेस (शरद पवार गट) आमदार रोहित पवार यांनी विकासकामांमधील निकृष्ट दर्जाबाबत एका सरकारी अधिकाऱ्याला थेट सुनावल्याचा व्हिडिओ सध्या सोशल मीडियावर जोरदार व्हायरल होत आहे. सार्वजनिक बैठकीत अधिकाऱ्याला “तू काय गोट्या खेळत होता काय?”, “खिशातून हात काढ”, अशा शब्दांत खडसावताना रोहित पवार दिसून येत आहेत. त्यांच्या या भाषेवर आता सामाजिक कार्यकर्त्या अंजली दमानिया यांनी तीव्र आक्षेप घेतला आहे.
कर्जत-जामखेड विधानसभा मतदारसंघातील जामखेड तालुक्यात नुकत्याच पार पडलेल्या एका आढावा बैठकीत, नागरिकांनी एका शासकीय योजनेतील निकृष्ट कामांविषयी रोहित पवार यांच्या निदर्शनास आणून दिले. यावेळी कामाचे फोटो नागरिकांनी मोबाईलवरून दाखवले. ते पाहून रोहित पवार यांचा पारा चढला आणि त्यांनी त्या विभागाच्या जबाबदार अधिकाऱ्याला चांगलेच सुनावले.
रोहित पवार म्हणाले, “हे फोटो दाखवणारे बावळट लोक नाहीत. हा तुमच्या बापाचा पैसा नाही, हा लोकांचा पैसा आहे. मिजासखोरपणा करू नकोस, खिशातून हात काढ. उद्या ही माणसं पिसाळली ना तर तुला इकडे फिरणे अवघड होईल.” यावेळी उपस्थित अधिकारी शांतपणे ऐकत उभा होता.
दमानिया यांचा सवाल – ही भाषा शोभते का?
या संपूर्ण प्रकाराचा व्हिडिओ व्हायरल झाल्यानंतर सामाजिक कार्यकर्त्या अंजली दमानिया यांनी रोहित पवार यांच्यावर टीका केली. “जसा काका, तसाच पुतण्या?” अशा शब्दांत त्यांनी अप्रत्यक्षपणे अजित पवार यांचाही उल्लेख करत रोहित पवारांच्या भाषाशैलीवर नाराजी व्यक्त केली. “निकृष्ट कामावरून जाब विचारणे योग्यच, पण सार्वजनिकरित्या अधिकाऱ्यांचा अपमान करणं शोभतं का?” असा सवाल त्यांनी उपस्थित केला आहे.
