जळगाव मिरर | २९ मे २०२५
गेल्या काही दिवसापासून राज्यात पुणे येथील वैष्णवी हगवणे प्रकरण जोरदार चर्चेत आले असून हगवणे प्रकरणात अटक करण्यात आलेल्या आरोपींना काल (दि. २८) कोर्टात हजर करण्यात आलं. कोर्टाने पती, सासू आणि नणंद यांना 1 दिवसाची, तर सासरा आणि दिर यांना पुन्हा 3 दिवसांची म्हणजे 30 तारखेपर्यंत पोलीस कोठडी सुनावली आहे. दरम्यान कोर्टात युक्तिवाद करताना हगवणे कुटुंबाच्या वकिलाने वैष्णवीच्या चारित्र्यावर संशय व्यक्त करत एक खळबळजनक दावा केला आहे.
मात्र, वैष्णवीच्या माहेरच्या कुटुंबीयांनी हे सर्व आरोप फेटाळून लावत आरोपी हा आरोपी असतो, तो गुन्हेगार असतो. कोणीही सहजपणे आपला गुन्हा कबूल करत नाही. आम्हाला न्यायव्यवस्थेवर पूर्ण विश्वास आहे, हगवणेंकडून केलेल्या आरोपांचा आम्ही निषेध करतो, असं म्हणत वैष्णवी हगवणे आत्महत्या प्रकरणात वैष्णवीच्या मामांनी आपली बाजू माध्यमांसमोर मांडली. तर, दुसरीकडे राष्ट्रवादी काँग्रेसच्या महिला प्रदेशाध्यक्षा रोहिणी खडसे यांनीही या प्रकरणात उडी घेत थेट वकिलांवर हल्लाबोल केला आहे. ‘जो त्या वकिलाच्या चार कानशिलात लावेल त्याचा मी सत्कार करणार’, असं रोहिणी खडसे यांनी म्हटलं आहे. रोहणी खडसेंनी ट्विट करत वकिलांना चपराक लगावली आहे.
हगवणेंच्या वकिलाने युक्तिवादादरम्यान वैष्णवीचे चारित्र्यहनन करण्याचा प्रयत्न केला. “वैष्णवीचे नको त्या व्यक्तीसोबत नको ते चॅट सुरु होते, ते आम्ही पकडले होते. त्याची माहिती आम्हाला हवी आहे. आम्हाला न्याय हवा आहे,”तसेच वैश्नवीची टेंडंसी सुसाईड करण्याची होती. तिने २ वेळा आत्महत्येचा प्रयत्न केला. एकदा रॅट पॉयझन खाऊन आणि एकदा गाडीतुन उडी मारून.
सरकारी वकिलाने युक्तिवाद करताना म्हटलं की, “आरोपींचे मोबाईल सापडलेले नाहीत. आरोपींचे मोबाईल तपासायचे आहेत. कदाचित मोबाईलमध्ये आणखी काही व्हिडिओ असण्याची शक्यता आहे. आरोपींनी वैष्णवीला मारहाण केली ती हत्यारे आणि रॉड हस्तगत करायचे आहेत. आत्तापर्यंत योग्य दिशेने पोलिसांचा तपास सुरू आहे” असे म्हंटले. फिर्यादींच्या वतीने ॲड. शिवम निंबाळकर यांनी काम पाहिले. आरोपींच्या वतीने ॲड. विपुल दुशिंग यांनी युक्तिवाद केला.
