पैठण : वृत्तसंस्था
राज्यात शिंदे गट व ठाकरे गट वाद आता चव्हाट्यावर आला असतानाचा पैठणमध्ये मुख्यमंत्री एकनाथ शिंदे यांच्या सभेसाठी पैसे देवून गर्दी जमविण्यात आल्याची ऑडिओ क्लिप व्हायरल झाल्याने खळबळ माजली आहे.
मंत्री संदीपान भुमरे यांचा मतदारसंघ असलेल्या पैठणमध्ये आज मुख्यमंत्री एकनाथ शिंदे यांची जाहीर सभा होणार आहे. या सभेत संदिपान भुमरे शक्तिप्रदर्शन करणार असून आज होणाऱ्या मुख्यमंत्र्यांच्या सभेला पैसे देऊन गर्दी जमवण्यात येत असल्याचा आरोप शिवसेनेकडून करण्यात आला आहे. दरम्यान यासंदर्भात एक ऑडिओ क्लिप सध्या व्हायरल होत आहे.
आज मुख्यमंत्र्यांच्या होणाऱ्या सभेसाठी महिलांना प्रत्येकी ३०० रूपये देण्याची मागणी करताना या क्लिपमध्ये ऐकायला येत आहे. तर समोरचा व्यक्ती एका महिलेला २५० रूपये देण्यासंदर्भात बोलत असल्याचं समजत आहे. त्याचबरोबर शिवसेनेचे नेते चंद्रकांत खैरे यांनीही पैसे देऊन गर्दी केली जाणार असल्याचा आरोप केला आहे.
