जळगाव मिरर | १८ ऑगस्ट २०२३
पुणे शहरातील बुधवार पेठेतील मैत्रिणीला खूश करण्यासाठी हॉटेलमध्ये शेफ म्हणून काम करणारा रात्री घरफोडी करायचा. एका घरफोडीत त्याच्या हाती परदेशी चलन लागले. हे पैसे उडवत असतानाच चंदननगर पोलिसांनी त्याला अटक केली.
मिळालेल्या माहितीनुसार, हरियाणा राज्यातील पानिपत येथील २१ वर्षीय तरुण फुरकान नईम खान असे त्याचे नाव आहे. त्याच्याकडून घरफोडीच्या तीन गुन्ह्यांचा छडा लावत पोलिसांनी चोरी केलेले परकीय चलन जप्त केले आहे. खराडी येथील सिनॅप्स लॅब्स प्रा. लिमिटेड कंपनीच्या ऑफिसमध्ये ७ ऑगस्ट रोजी चोरी झाली होती. चोरट्याने तेथून तीन लाख सात हजार ४९२ रुपयांचे भारतीय व परकीय चलन चोरी केले होते. याबाबत पवन चव्हाण (३०) यांनी फिर्याद दिली होती. पोलिसांना तांत्रिक विश्लेषण आणि बातमीदारामार्फत खान याच्याबद्दल माहिती मिळाली होती. सध्या तो पिंपरी-चिंचवड येथे असल्याचे समजले. त्याला ताब्यात घेऊन चौकशी केली असता त्याने गुन्ह्याची कबुली दिली.
