जळगाव मिरर | १५ मे २०२५
प्रेयसीला व्हिडीओ कॉल करुन मी ऑपरेशन मौतजवळ पोहोचलो आहे, असे म्हणत सौरभ शर्मा (रा. अहमदाबाद) या तरुणाने अमळनेर बस स्थानकाजवळील लॉजमध्ये गळफास घेत आत्महत्या केली. ही घटना मंगळवारी सायंकाळच्या सुमारास उघडकीस आली. शर्मा याने त्याच्या डायरीत त्याला फसवणाऱ्या मुलीचा व तिच्या नातेवाईकांचा उल्लेख केला असून ती डायरी पोलिसांनी हस्तगत केली आहे. दरम्यान, गुजरामध्ये शर्माविरुद्ध पोस्कोचा देखील गुन्हा दाखल आहे.
मिळालेल्या माहितीनुसार, गुजरातमधील सौरभ शर्मा नामक तरुण गेल्या पाच ते सहा दिवसांपासून अमळनेर येथील पाठक प्लाझामध्ये करणसिंग एम. पी. या नावाने खोली भाड्याने घेतली होती. हा तरुण दररोज लॉजमधील कर्मचाऱ्यांना त्याला सकाळी ११ वाजता उठवायला सांगायचा. मात्र, १२ तारखेला त्याने सांगून ठेवले होते की, मला उशिरा उठवा. दि. १३ रोजी दुपारी लॉजचे कर्मचारी त्याला उठवायला गेले, तेव्हा त्याने आवाज दिला नाही, तर दरवाजा ही आतून बंद होता. सायंकाळी पुन्हा त्याला उठवण्याचा प्रयत्न केला असता त्याने प्रतिसाद न दिल्याने पोलिसांना बोलावण्यात आले. त्यानंतर पोलीस निरीक्षक दत्तात्रय निकम, पोलीस उपनिरीक्षक भगवान शिरसाठ, पोलीस उपनिरीक्षक राजू जाधव, हेडकॉन्स्टेबल विनोद भोई, हेडकॉन्स्टेबल विनोद सोनवणे, प्रमोद पाटील यांनी घटनास्थळी धाव घेतली.
पोलिसांनी लॉजमधील रुमचा दरवाजा तोडून आत डोकावले असता करणसिंगने चादर फाडून छताच्या कडीला गळफास घेतलेल्याचे दिसून आले. पोलिसांनी त्याला खाली उतरवून तात्काळ रुग्णालयात दाखल केले. याठिकाणी वैद्यकीय अधिकाऱ्यांनी त्याची तपासणी करीत मयत घोषीत केले. पोलिसांनी मयताची चौकशी करण्यास सुरुवात केली असता, त्याचे नाव सौरभ शर्मा असे असून तो गुजरात राज्यातील अहमदाबाद येथील असल्याचे पोलिसांनी सांगितले. त्याच्यावर पोस्कोचा गुन्हा दाखल असल्याचे पोलिसांच्या चौकशीत उघड झाले आहे. आत्महत्येपूर्वी सौरभ शर्मा याने प्रेयसीशी व्हिडिओ कॉल करून मी ऑपरेशन मौतजवळ पोहोचलो आहे, असे म्हटले आहे. तसेच शर्मा याने त्याच्या डायरीत त्याला फसवणाऱ्या मुलीचा व तिच्या नातेवाईकांचा उल्लेख केला असून ती डायरी, मोबाईलसह इतर साहित्य फॉरेन्सिकच्या पथकाने ताब्यात घेतले आहे. याप्रकरणी अमळनेर पोलीस ठाण्यात अकस्मात मृत्यूची नोंद करण्यात आली.
