शेंदुर्णी ता.जामनेर : प्रतिनिधी
कवयित्री बहिणाबाई चौधरी उत्तर महाराष्ट्र विद्यापीठ जळगाव आणि पुज्य साने गुरुजी महाविद्यालय शहादा यांच्या संयुक्त विद्यमाने युवारंग-२०२२ शहादा येथे दि. १९ एप्रिल ते २३ एप्रिल दरम्यान आयोजित करण्यात आला होता. या विद्यापीठस्तरीय सांस्कृतिक स्पर्धेत विद्यापीठ परिक्षेत्रातील जळगाव, धुळे व नंदुरबार जिल्ह्यातील सर्व महाविद्यालयांनी उत्साहात सहभाग नोंदवला होता.
युवारंगात धी शेंदूर्णी सेकं.एज्यु.को-ऑप सो.संचालित अप्पासाहेब र.भा. गरुड महाविद्यालयाच्या संघाने हिरीरीने सहभाग घेऊन नेत्रदीपक यश संपादन करून एक रजत पदक व एक कांस्य पदक मिळविले. यात कु.सुमिता पाटील हिने व्यंगचित्र कला प्रकारात उत्कृष्ट सादरीकरण करत रजत पदक प्राप्त केले. कु.गायत्री पाटील, कु.स्नेहल वाघ,भूषण हिवाळे, कु.धर्मेश्वरी गुजर यांच्या संघाने इंस्टालेशन ह्या कलाप्रकारात उत्कृष्ट सादरीकरण करीत कांस्य पदक प्राप्त केले. या स्पर्धेत महाविद्यालयातील एकूण १० विद्यार्थ्यांचा संघ सहभागी झाला होता. त्यात अंजलीका हटकर, महेंद्र घोंगडे, अक्षय पवार, स्वप्नील जाधव व कु.रंजना कुमावत यांनी इतर कला प्रकारात उत्कृष्ट सादरीकरण करुन सहभाग घेतला. महाविद्यालयातील संघाने विडंबन, माईम, मिमिक्री, मेहंदी, वादविवाद व वक्तृत्व स्पर्धेत सुद्धा ताकदीचे सादरीकरण करून प्रेक्षकांची दाद मिळवली.
संघाचे संघव्यवस्थापक व मार्गदर्शक म्हणून विद्यार्थी विकास अधिकारी डॉ.आजिनाथ.एन. जिवरग व महिला विद्यार्थी विकास अधिकारी डॉ.योगिता चौधरी यांनी जबाबदारी सांभाळली. तसेच आय.क्यू.ए.सी. समन्वयक डॉ. दिनेश प्रकाश पाटील यांनी सुद्धा युवारंग आयोजन समिती सदस्य म्हणून उपस्थिती देऊन संघास मोलाचे सहकार्य केले. या मिळालेल्या यशाबद्दल संस्थेचे अध्यक्ष संजय गरुड, सचिव सतिष काशीद, महिला संचालिका उज्ज्वला काशीद, सहसचिव दीपक गरुड, महाविद्यालयाचे प्राचार्य डॉ.वासुदेव आर.पाटील यांनी सहभागी व यश संपादन केलेल्या विद्यार्थ्यांचे कौतुक केले. ग्रामीण भागातील महाविद्यालयाने मिळविलेल्या यशाबद्दल परिसरातून आनंद व्यक्त केला जात असून सहभागी विद्यार्थ्यांवर कौतुकाचा वर्षाव होत आहे.
