पुणे : शिवसेनेचे बंडखोर नेते आणि महाराष्ट्राचे मुख्यमंत्री एकनाथ शिंदे यांनी सेनेचे ४० आमदार फोडत महाविकास आघाडीला असा काही धक्का दिला आहे की त्यातून प्रचंड राजकीय उलथापालथ होत थेट सत्तांतरणच झालं. त्यामुळे या शिंदे-फडणवीसांच्या नवीन सारकरवर आता विरोधक सडकून टीका करत आहेत. याचदरम्यान, राष्ट्रवादी काँग्रेसच्या खासदार सुप्रिया सुळे यांनी शिंदे-फडणवीस सरकारवर सडकून टीका केली आहे.
शिंदे सरकार हे सर्वसामान्यांचे सरकार नाही विमानाने फिरतेय, फाईव्ह स्टार हॉटेलमध्ये अडीच हजार रुपयांची दाढी करतंय, असा टोला सुप्रिया सुळे यांनी लगावला आहे. सुप्रिया सुळे या काल पुण्यात प्रति पंढरपूर असलेल्या मंदिराला भेट देण्यासाठी आल्या होत्या. त्यावेळी त्यांनी शिंदे – फडणवीस सरकारचा खरपूस शब्दांत समाचार घेतला.
मी विठ्ठलाचे आशीर्वाद घेण्यासाठी आणि आभार मानण्यासाठी आले आहे. हे सरकार अस्थिर आहे हे अजितदादा म्हणतोय ते खरं आहे. ज्या पद्धतीने हे लोक सुरत, गुवाहटी, गोवा भारत दर्शन करून आले. ज्या रीतीने आपल्या आमदारांना बाहेर राज्यातील पोलीस हाताळत होते, हे अत्यंत दुर्दैवी आहे. हे जे काही होतंय ते महाराष्ट्राच्या समाजकारणासाठी आणि राजकारणासाठी हिताचं नाहीये,” असं सुप्रिया सुळे म्हणाल्या आहेत.
दरम्यान, मित्र पक्ष म्हणून आम्ही शिवसेनेला शेवपर्यंत साथ दिली आहे आणि यापुढेही देत राहणार. शिवसेनेचा उत्तराधिकारी कोण हे बाळासाहेब ठाकरे यांनी आधीच ठरवलं होतं आणि बाळासाहेबांच्या आदेशाच्या वेगळं काही करणं हे बाळासाहेबांना दुखावण्याचं काम आहे, असं म्हणत शिवसेनेच्या बंडखोर आमदारांना सुप्रिया सुळे यांनी टोला लगावला.
