ग्रीन सिटी फाउंडेशन व हिरवांकुर फाउंडेशनचा पर्यावरण संवर्धनासाठी पुढाकार
जळगाव मिरर | २० नोव्हेंबर २०२६

जळगाव : ग्रीन सिटी फाउंडेशन व हिरवांकुर फाउंडेशन यांच्या संयुक्त सामाजिक पुढाकारातून मन्यारखेडा येथील नंदनवन प्रकल्प परिसरात ३,१३१ वृक्षांचे भव्य वृक्षारोपण करण्यात आले. या पर्यावरणपूरक उपक्रमात श्री संत ज्ञानेश्वर प्राथमिक व माध्यमिक विद्यालय, एनसीसी पथक, नूतन मराठा महाविद्यालय, शाहीन ईकरा कॉलेज आणि विद्या इंग्लिश मीडियम स्कूलमधील विद्यार्थी उत्साहाने सहभागी झाले होते.
या कार्यक्रमाला राज्याचे पाणीपुरवठा मंत्री ना. गुलाबरावजी पाटील, जळगाव शहराचे माजी आमदार सुरेशदादा जैन, माजी खासदार ईश्वरबाबू जैन, आमदार चंद्रकांत बळीराम सोनवणे, ग्रीन सिटी फाउंडेशनचे विजय वाणी, हिरवांकुर फाउंडेशनचे निलय शहा, इजाजजी मलिक, करीम सालार, बिट्टू सालार, विनय पारख तसेच वनविभागाचे विभागीय वनाधिकारी (DFO) महेश झंझुरणे यांची प्रमुख उपस्थिती होती.
यावेळी मान्यवरांनी विद्यार्थ्यांशी संवाद साधत वृक्षारोपणाचे महत्त्व विशद केले. पर्यावरणाचा समतोल राखण्यासाठी वृक्षसंवर्धन अत्यंत आवश्यक असून, केवळ झाडे लावून थांबण्यापेक्षा त्यांचे संगोपन करणे ही काळाची गरज असल्याचे मत त्यांनी व्यक्त केले. विद्यार्थ्यांनी पर्यावरण संवर्धनाची जबाबदारी बालवयापासूनच स्वीकारावी, असे आवाहनही करण्यात आले.
ग्रीन सिटी फाउंडेशनचे विजय वाणी आणि हिरवांकुर फाउंडेशनचे निलय शहा यांच्या आयोजनातून हा उपक्रम यशस्वीरीत्या पार पडला. विविध शैक्षणिक संस्थांतील विद्यार्थ्यांनी एकत्र येऊन वृक्षारोपणात दिलेला सहभाग हा या उपक्रमाचा विशेष ठरला.
विद्यार्थ्यांच्या हातून लावलेले ३,१३१ वृक्ष भविष्यातील हरित पर्यावरणाचा भक्कम आधार ठरतील. मन्यारखेडा नंदनवन प्रकल्पाच्या माध्यमातून वृक्षारोपणासोबतच वृक्षसंवर्धनाचा संदेश समाजापर्यंत पोहोचविण्यात आला.




















