जळगाव मिरर | २० नोव्हेंबर २०२६
शहरातील वेगवेगळ्या भागातून दुचाकी चोरुन करुन त्याची कमी किंमतीमध्ये विक्री करणाऱ्या निर्मल राजेंद्र ठाकूर (रा. कांचननगर) व मनोज मोहन रंधे (रा. नशिराबाद, ता. जळगाव) या दोघांच्या रामानंद नगर पोलिसांनी मुसक्या आवळल्या. त्यांच्याकडून पाच चोरीच्या दुचाकी हस्तगत करण्यात आल्या आहेत.

मिळालेल्या माहितीनुसार, पिंप्राळा परिसरातील रथ चौकातून बापू दत्तू कोळी यांची (एमएच १९, बीई ८१६१) क्रमांकाची दुचाकी घरासमोरुन चोरी झाल्याची घटना घडली होती. याप्रकरणी गुन्हा दाखल झाल्यानंतर पोलीस निरीक्षक मधुकर साळवे यांनी चोरट्याच्या शोधार्थ गुन्हे शोध पथकातील उपनिरीक्षक सचिन रणशेवरे, पोहेकॉ जितेंद्र राजपूत योगेश बारी, मनोज मराठे, सुमेध इंधाटे, मुकुंद गवते, सागर नन्नवरे यांचे पथक रवाना केले.
या पथकाने तांत्रिक विश्लेषणाच्या आधारावर तपास ही चोरी निर्मल ठाकूर याने केल्याचे समजले. त्यानुसार पोलिसांनी कांचन नगरातून संशयित निर्मल ठाकूर याला ताब्यात घेतले. त्याची कसून चौकशी केल्यानंतर त्याने साथीदार मनोज रंधे याच्या मदतीने आणखी काही ठिकाणाहून दुचाकी चोरल्याची कबुली दिली. गुन्हे शोध पथकातील कर्मचाऱ्यांनी दोघांची कसून चौकशी केल्यानंतर त्यांनी जळगाव शहरातील पिंप्राळा, ईच्छादेवी व चोपडा शहरातून चोरलेल्या पाच दुचाकी काढून दिल्या. पोलिसांनी या दुचाकी जप्त केल्या आहे





















