जळगाव मिरर । २८ ऑक्टोबर २०२२
राज्यात शिंदे गटामध्ये विविध पक्षामधून प्रवेश करीत असले तरी राज्यातील मुक्ताईनगर मतदार संघात हि राष्ट्रवादी पक्षाला मोठा धक्का बसला आहे. राष्ट्रवादीचे दिग्गज नेते एकनाथराव खडसे यांचा बालेकिल्ला मानला जाणारा मुक्ताईनगर तसेच रावेर तालुक्यातील राष्ट्रवादी काँग्रेसच्या पदाधिकाऱ्यांनी मुख्यमंत्री एकनाथ शिंदे यांच्या बाळासाहेबांच्या शिवसेनेत प्रवेश केला. मंत्री गुलाबराव पाटील यांच्या उपस्थितीत गावातील अजिंठा शासकीय विश्रामगृह येथे राष्ट्रवादीच्या पदाधिकाऱ्यांनी बाळासाहेबांच्या शिवसेनेचा झेंडा हाती घेतला. एकनाथ खडसे यांच्यासाठी हा मोठा धक्का मानला जात आहे.
मुक्ताईनगर येथील राष्ट्रवादीचे सोशल मीडिया माजी जिल्हाध्यक्ष शिवराज पाटील, तालुका राष्ट्रवादी सरचिटणीस वाय डी पाटील, निंभोरा उपसरपंच प्रशांत पाटील, राष्ट्रवादी सोशल मीडिया ब्लॉगर शुभम मुर्हेकर (धामोडी ता रावेर) यांनी आज त्यांच्या कार्यकर्त्यांसह मंत्री गुलाबराव पाटील यांच्या उपस्थितीत बाळासाहेबांच्या शिवसेनेत प्रवेश केला.
दरम्यान, या पक्षांतरावरुन मंत्री गुलाबराव पाटील यांनी एकनाथ खडसेंना डिवचले. “त्यांना धक्के तर कायमच चालले आहेत, त्यांना धक्क्यावर धक्के बसत आहेत. लोण्याचे धक्के, दुधाचे धक्के, तुपाचे धक्के व आता हे माणसांचे धक्के” अशा शब्दात मंत्री गुलाबराव पाटील यांनी एकनाथ खडसेंना जोरदार टोला लगावला आहे. तसेच अशाच प्रकारे बाळासाहेबांच्या शिवसेनेत लोंढेच्या लोंढे येतील, लवकरच मुक्ताईनगर येथे संपर्क यात्रा होणार असून यावेळी हजारोंच्या संख्येने कार्यकर्ते बाळासाहेबांच्या शिवसेनेत प्रवेश करणार असल्याचे संकेत देत मंत्री गुलाबराव पाटील यांनी एकनाथ खडसे यांना आव्हान दिले आहे. रावेर तालुक्यातील ऐनपुर येथे एकनाथ खडसे यांच्या कन्या ॲड रोहिणी खडसे – खेवलकर यांच्यातर्फे राष्ट्रवादी काँग्रेस पक्ष संघटनासाठी जनसंवाद यात्रा काढण्यात आली. या यात्रेनिमित्ताने आज प्रमुख अतिथी आमदार निलेश लंके तसेच युवती काँग्रेसच्या प्रदेशाध्यक्ष सक्षणा सलगर यांची सभा पार पडत असताना दुसरीकडे मुक्ताईनगर, रावेर तालुक्यातील राष्ट्रवादी पदाधिकाऱ्यांनी बाळासाहेबांच्या शिवसेनेत प्रवेश केल्याने राजकीय वर्तुळात खळबळ उडाली आहे .
