जळगाव मिरर । ८ नोव्हेबर २०२२
भडगाव तालुक्यातील विठ्ठलवाडी-मलकापूर बसमध्ये किरकोळ वादातून प्रवाशी आणि कंडक्टरमध्ये चांगलाच राडा झाला. भडगाव पोलिसात जबरी चोरीसह शासकीय कामात अडथळा आणल्याप्रकरणी परस्पर विरोधी गुन्हे दाखल करण्यात आले आहेत.
याप्रकरणी पहिल्या फिर्यादीत नगरदेवळा येथील ५६ वर्षीय वृद्ध आना सखाराम मोरे हे दि ७ रोजी विठ्ठलवाडी ते मलकापूर बस मधून उतरले. यावेळी बसच्या कंडक्टरचा (नाव-गाव माहित नाही) पाय मोरे यांच्या गुडघ्याला लागला. यातून दोघांमध्ये वादावादी झाली. यानंतर कंडक्टरने मोरे यांच्या गळ्यात जबरीने हात टाकत चैन हिसकविण्याचा प्रयत्न्न करून या ठिकाणी चार चौघात ५६ वर्षीय वृद्धाला शिवीगाळ करीत अपमान केल्याप्रकरणी भडगाव पोलिसात गुन्हा दाखल करण्यात आला आहे. पुढील तपास पौउनी.गणेश वाघमारे हे करीत आहेत.
तर दुसऱ्या फिर्यादीत म्हटले आहे की, विठ्ठलवाडी ते मलकापूर बस (क्र.एम.एच.१३ सी.यु.८१०७) बस भडगाव बसस्थानकात आल्यावर संशयित आरोपी अण्णा सखाराम मोरे व त्यांचा मुलगा यांना बसमध्ये धक्का लागल्याच्या कारणातून त्यांनी वाद घालायला. सुरुवात केली. तसेच बस वाहक दत्तात्रय गणेश नाथबुवा (वय ३७) यांना शिवीगाळ करीत जबरी मारहाण करून बसच्या खाली उतरवून पाच ते सहा जणांनी मारहाण केली. या मारहाणीत नाथबुवा यांच्या जवळील १३ ते १४ हजार रुपये गहाळ झालेत. याप्रकरणी त्यांनी भडगाव पोलिसात धाव घेत सरकारी कामात अडथळा आणल्या प्रकरणी अण्णा मोरे, त्यांचा मुलगा आणि इतर पाच ते सहा जणांविरुद्ध गुन्हा दाखल केला आहे. पुढील तपास पोउनी गणेश वाघमारे करीत आहेत.
