जळगाव मिरर । १३ नोव्हेबर २०२२
कोविड काळानंतर मोठ्या प्रमाणात म्हणजेच १८ हजार ३३१ पदासाठी भरती होत आहे, यामध्ये बॅन्ड वादक पदासाठी एकही जागा नाही. यामुळे बॅन्ड पोलिसाची तयारी करणाऱ्या दहा ते बारा हजार उमेदवारांची निराशा झाली आहे. भरतीमध्ये बॅन्ड पथकासाठीही भरतीच्या जागा असतात. यासाठी शिक्षण आणि उंची यात सवलत असते. वाद्य वाजवण्याची आवड असणारे विद्यार्थी या भरतीसाठी तयारी करत असतात. यासाठी मैदानी चाचणी व लेखी परीक्षेबरोबरच वाद्य वाजवण्याचे प्रशिक्षण घ्यावे लागते. दोन ते तीन वर्षे तयारी करूनही यावर्षीच्या पोलिस भरतीमध्ये बॅन्ड पोलिसासाठी एकही जागा नसल्यामुळे उमेदवार व पालक यांनी नाराजी व्यक्त केली आहे.
गृह विभागाने या भरती प्रक्रियेत बॅन्ड पोलिस पदाचा सामावेश करून घ्यावा, यासाठी मंत्री गिरीश महाजन यांना निवेदन देण्यात आले. यावेळी गोकुळ कोळी, बजरंगी भोई, सुरेश दांडगे, रवी महाजन, गोपाल कोळी, ज्ञानेश्वर कोळी, निशांत विसपुते, सागर जातोड, अमोल पांढरे, गणेश अस्वर, शुभम विंचवेकर, नंदू चौधरी आदी उपस्थित होते.
