जळगाव मिरर । १४ नोव्हेबर २०२२
तालुक्यातील फेकरी शिवारातील रेल्वे उड्डाणपुलाजवळ दोन वाहनांचा भीषण अपघात झाला. या अपघातात एक २८ वर्षीय युवक ठार झाला, तर अन्य एकजण जखमी झाला. ही घटना रविवारी सकाळी घडली.
फेकरी शिवारातील रेल्वे उड्डाणपुलाजवळ नॅशनल हायवे क्रमांक ५३ वर भुसावळकडून वरणगावकडे भरधाव वेगाने जाणाऱ्या जी.जे. ०३- बी.टी- ५७२८ क्रमांकाच्या ट्रकने वरणगावकडून भुसावळकडे येणाऱ्या मालवाहतूक व्हॅन क्रमांक एम.एच.२८ ए. बी. ४३३४ या वाहनास धडक दिली. यात शिवचरण अरुण मानेकर (वय २८ रा. पहूरपुर्णी जिल्हा बुलढाणा) चालक गंभीर जखमी झाला. फेकरी गावचे पोलीस पाटील किशोर बोरोले हे नेहमीप्रमाणे पहाटे फिरायला गेले असताना त्यांना अपघाताबाबत माहिती मिळाली. त्यांनी पोलीस स्टेशनला व हायवे मोबाइल व्हॅनला फोन केला. अपघातातील जखमींना जळगाव येथील शासकीय रुग्णालयात रवाना केले. गंभीर जखमी शिवचरण मानेकर यांना डॉक्टरांनी मयत घोषित केले.
