जळगाव मिरर / १५ नोव्हेंबर २०२२
पुणे जवळील जेजुरी येथे असलेल्या आयएसएमटी कंपनीत लोखंडाचा रस वाहून नेणाऱ्या लॅडलची साखळी ( वायर रोप ) तुटल्याने वितळलेला लोहरस अंगावर पडुन आठ जण भाजल्याची घटना समोर आली आहे. या घटनेने खळबळ उडाली होती. या आठ जणांना तातडीने रुग्णालयात दखल करण्यात आले असून त्यांच्यावर उपचार सुरू आहेत.
या अपघातात क्रेन चालक जितेंद्र सिंग, सुजित विलास बरकडे ( वय २५), चुनेज भानुदास बरकडे ( वय २२), अरूनकुमार सिन्हा ( वय ५२ ) आकाश यादव ( वय २२) दुर्गा यादव ( वय ४०) शिवाजी राठोड ( वय ३८) मनोरंजन दास ( वय ३५) हे अंगावर वितळत्या लोखंडाचा रस पडलेल्या कामगारांची नावे आहेत. यातील चारजण गंभीर जखमी असून, क्रेन चालक जितेंद्र सिंग याला पुणे येथील खासगी रुग्णालयात हलविण्यात आले आहे.
मिळालेल्या माहितीनुसार जेजुरीजवळील असणाऱ्या मोरगाव रस्त्यावर आयएसएमटी ही कंपनी आहे. या कंपनीत लोखंडी रॉड, सळई बनवण्याचे काम केले जाते. कंपनीत बॉयलरमध्ये १६५० ते १८०० डिग्री सेल्सिअस ला लोखंड वितळवून लोहरस बनवला जातो. याच लोहरसा पासून वेगवेगळ्या आकाराचे रॉड, वा सळई बनवल्या जातात. अपघातात वरून पडलेल्या लोह रसाने आठ जण जखमी झाले असून सुदैवाने मोठी दुर्घटना टळली आहे. मात्र, लोखंडापासून बनवलेल्या लोहरसाने कामगार भाजले आहेत. या संदर्भात कंपनी व्यवस्थापनाशी संपर्क केला असता व्यवस्थापनाकडून कोणतीही अधिकृत माहिती अद्याप देण्यात आली नसली तरी या घटनेचा व्हिडिओ सध्या सोशल मीडियावर व्हायरल झाला आहे.
