जळगाव मिरर । १६ नोव्हेबर २०२२
जळगाव जिल्हा दूध संघातील तुपाची पूर्वपरवानगी न घेता कमी दरात विक्री केल्याप्रकरणी दूध संघाचे कार्यकारी संचालक मनोज लिमये यांच्यासह चार जणांना सोमवारी रात्री शहर पोलिसांकडून अटक करण्यात आली. दरम्यान, याच रात्री लिमयेंविरुध्द शहर पोलिसात तक्रार दाखल झाल्याने खळबळ उडाली आहे.
विशेष म्हणजे या तक्रारीत दूध संघ निवडणुकीतील रावेर तालुका मतदार संघातील मविआचे उमेदवार जगदीश बढे यांना बिनविरोध काढण्यासाठी खोटे दाखले देत फसवणूक केल्याचा आरोप तक्रारदार ठकसेन भास्कर पाटील (रा. चिनावल, ता. रावेर) यांनी केला आहे. ठकसेन पाटील यांनी शहर पोलिसात दिलेल्या तक्रारीत म्हटले आहे की, सध्या दूध संघाची निवडणूक प्रक्रिया सुरू आहे. ठकसेन पाटील यांनी वसंत सहकारी दूध उत्पादक सोसायटी, चिनावल या संस्थेमार्फत तालुका प्रतिनिधी म्हणून नामनिर्देशन पत्र दूध संघामध्ये भरला होता. नामनिर्देशन पत्र भरताना जो दूध पुरवठा लागत होता, त्याचा दाखला काढला होता. त्यामध्ये ३६५ दिवसांचा दूध पुरवठा त्यांनी २०१९-२० : ८९७५१ लिटर २०२०-२१ ४८३१७ लिटर, २०२१-२२ ४२६३८ लिटर असा ७ नोव्हेंबरला दिला. त्यानंतर ठकसेन यांनी १० नोव्हेंबर रोजी नामनिर्देशन पत्र दाखल केले. दुसऱ्यादिवशी ११ नोव्हेंबरला पाटील यांचे नामनिर्देशनपत्र बाद करण्यात आले.
त्यावेळी त्यांना पुरवठा केलेला दूध साठा कमी असल्याचे कारण सांगण्यात आले. पाटील यांनी लागलीच स्थानिक संस्थेत तपास केला असता, दूध पुरवठा २०१९-२० : १६१५२९ लिटर, २०२०-२१ : ८६९८४ लिटर, २०२१-२२ : ८१०६० लिटर असा आढळून आला. जिल्हा दूध संघात ओरड केल्यानंतर ठकसेन यांना योग्य दाखला देण्यात आला. अशाप्रकारे नामनिर्देशन पत्र रद्द करून विद्यमान संचालक जगदीश बढे यांना बिनविरोध निवडून आणण्यासाठी कार्यकारी संचालक यांनी खोटे दाखले देऊन आपली फसवणूक केल्याचा आरोप ठकसेन पाटील यांनी तक्रारीतून केला आहे. सोमवारी रात्री ठकसेन पाटील यांनी ही तक्रार दिली आहे.
