तरुणाने रस्त्यावर केले अर्ध नग्न आंदोलन

रावेर : प्रतिनिधी
घराजवळ झालेल्या वादाची तक्रार देण्यासाठी गेलेल्या तरुणाला पोलिसांनी मारहाण केली. यामुळे त्या तरुणाने पोलिस ठाण्याबाहेर तापलेल्या रस्त्यावर अर्धा तास अर्ध नग्न होत ठिय्या आंदोलन केले. पोलिसांवर तोंडसुख घेतल्याची घटना बुधवारी सायंकाळी घडली.
सविस्तर वृत्त असे कि,  अहिरवाडी येथील मंगल राजपूत या तरुणाच्या घराजवळील गटारीतील सांडपाण्यावरून वाद झाले. ही तक्रार देण्यासाठी तो दुपारी ३ वाजता रावेर पोलिस ठाण्यात आला. मात्र, पोलिसांनी तक्रार न घेता या उलट तरुणाला मारहाण केली होती. याचा निषेध म्हणून मंगल राजपूतने सायंकाळी ५ वाजता अर्ध नग्न होत पोलिस ठाण्यासमोरील रस्त्यावर झोपून ठिय्या आंदोलन केले. यामुळे वाहतुकीला काही प्रमाणात अडथळा निर्माण झाला. पोलिस कर्मचारी विजू जावरे, सुनील वंजारी यांनी राजपूतला रस्त्यावरून हलवून पोलिस ठाण्यात नेले. यानंतर दोन तासांनी त्याला अहिरवाडीला घरी पोहोचवल्याचे पोलिसांनी सांगितले.