जळगाव मिरर | १४ मे २०२३
३५ बोगस चिनी लोन अॅप इन्स्टॉल करायला सांगून पैशांची मागणी केलेली नसतानासुद्धा लोन स्वरूपात ६ लाखाची रक्कम पहूर येथील डॉ. जितेंद्र वानखेडे यांच्या बँक खात्यात पाठविली. त्यानंतर लोनचे पैसे व्याजासह परत करण्याच्या नावाखाली जिवे मारण्याची धमकी देऊन डॉक्टराकडून ४ लाख २३ हजार ७१९ रुपये उकळणाऱ्या सायबर ठगांच्या गँगच्या सायबर पोलिसांनी बंगळुरू (कर्नाटक) येथून मुसक्या आवळल्या आहेत. त्यांच्याजवळून २ लाख रुपयांची रक्कम हस्तगत करीत ती रक्कम डॉक्टरांना परत करण्यात आली आहे.
मिळालेल्या माहितीनुसार, डॉ. जितेंद्र वानखेडे यांना ९ जुलै २०२२ ते २१ सप्टेंबर २०२२ या कालावधीत सायबर ठगांनी संपर्क साधून ३५ चिनी लोन अॅप इस्टॉल करण्यास सांगितले. त्यानंतर त्यांनी वानखेडे यांच्या मोबाईलमधील संपूर्ण डाटा चोरून घेतला. पैशांची मागणी केलेली नसतानासुद्धा ठगांनी वानखेडे यांच्या बँग खात्यामध्ये लोन स्वरूपात ६ लाख ८ हजार रुपये पाठविले. नंतर त्यांना ठगांनी लोनचे पैसे व्याजासह परत करण्याच्या नावाखाली जीवे ठार मारण्याची धमकी देऊन अधिक पैशांची मागणी केली. पैसे पाठविले नाही म्हणून ठगांनी बदनामीकारक संदेश वानखेडे यांच्या नातेवाईक व परिचितांना पाठविण्यास सुरुवात केली. त्यामुळे त्यांनी उसनवारीने पैसे घेऊन ठगांना ४ लाख २३ हजार रुपये पाठविले. मात्र, ठगांकडून पुन्हा पैशांची मागणी होत असल्यामुळे वानखेडे यांनी सायबर पोलिस ठाणे गाठून संपूर्ण हकीकत पोलिसांना सांगितली. त्यानंतर गुन्हा दाखल करण्यात आला.
निरीक्षक अशोक उत्तेकर यांच्यासह कर्मचाऱ्यांनी डॉक्टरांनी दिलेले कागदपत्र व लोन अॅपची ह व: रक्कम भरली, अशी सर्वांची माहिती घेऊन तांत्रिक विश्लेषणाद्वारे रे संशयित सार ठग हे बंगळुरू येथील असल्याची माहिती निष्पन्न झाली. त्यानंतर पोलिस उपनिरीक्षक दिगंबर थोरात, प्रवीण वाघ, राजेश चौधरी, दिलीप चिंचोले, दीप्ती अनफाट, दीपक सोनवणे, गौरव पाटील. अरविंद वानखेडे यांचे पथकाने बंगळुरु गाठून प्रवीण गोविंदराज (२८), सतीश पी (३०, दोन्ही रा. बंगळुरू यांना अटक केली.
२ लाखांची रक्कम सुपूर्द
दोघांची पोलिसांनी कसून चौकशी केल्यानंतर त्यांनी २ लाख रुपयांची रक्कम काढून दिली. ही रक्कम शुक्रवारी पोलिस उपअधीक्षक संदीप गावित व पोलिस निरीक्षक अशोक उत्तेकर यांच्या हस्ते फिर्यादी डॉ. जितेंद्र वानखेडे यांना परत देण्यात आली.
