जळगाव मिरर | २५ ऑक्टोबर २०२६
खांबावर काम करताना विजेचा धक्का लागून किरण दत्तात्रय सपकाळे (वय ४२, रा. आशाबाबा नगर) या वायरमनचा मृत्यू झाला. ही घटना शनिवारी दि. २४ ऑक्टोबर रोजी एमआयडीसी परिसरात घडली. याप्रकरणी पोलीसात अकस्मात मृत्यूची नोंद करण्यात आली आहे.
मिळालेल्या माहितीनुसार, शहरातील आशाबाबा नगरात राहणारे किरण सपकाळे हे महावितरणमध्ये वायरमन म्हणून कामाला होते. शनिवारी एमआयडीसी परिसरातील भारत पेट्रोलियम प्लांटपासून काही अंतरावर असलेल्या वीज खांबावर ते दुरुस्तीचे काम करत होते. त्या वेळी त्यांना अचानक विजेचा जोरदार धक्का लागला व ते खांबावरुन थेट खाली कोसळले. हा प्रकार त्यांच्यासोबत असलेल्या कर्मचाऱ्यांच्या लक्षात येताच त्यांना शासकीय वैद्यकीय महाविद्यालय व रुग्णालयात दाखल केले असता डॉक्टरांनी मृत घोषित केले.
खांबावर काम करण्यासाठी वीजपुरवठा खंडीत करण्याचे परमिट घेतलेले होते तरी वीजपुरवठा सुरू झाला व ही घटना घडली अशी माहिती रुग्णालयात मयताच्या मित्रांनी दिली. घटनेची माहिती मिळताच कर्मचारी, मित्र परिवार यांची रुग्णालयात गर्दी झाली होती. मयताच्या पश्चात पत्नी, एक मुलगा, एक मुलगी असा परिवार आहे.
