जळगाव मिरर | ३० मे २०२३
छत्रपती संभाजीनगर जिल्ह्यातील वाळूज महानगर येथे पतीसोबत वाद झाल्याने मैत्रिणीकडे आश्रयासाठी जाणे एका २५ वर्षीय तरुणीला चांगलेच महागात पडले. मैत्रिणीने साथीदाराच्या मदतीने तिला दोन दिवस डांबून ठेवत वयस्कर व्यक्तीसोबत लग्न लावण्याचा प्रयत्न केल्याची खळबळजनक घटना उद्योगनगरीत उघडकीस आली आहे.
मिळालेल्या माहितीनुसार, दि. २२ मे रोजी सोनमचा (बदललेले नाव) पतीसोबत वाद झाला. त्यानंतर ती जोगेश्वरीतील मैत्रीणीच्या घरी आश्रयासाठी गेली होती. दुसऱ्या दिवशी सोनमला ती मैत्रीण तुझा नवरा तुला घरात घेणार नाही, आपण दोघी चितेगावला मैत्रिणीकडे जाऊ अशी थाप मारली. यानंतर ती मैत्रीण सोनमला चितेगावला नेले. काही वेळाने मैत्रिणीची आई व तिचा मित्र हे दोघे चितेगावला पोहोचले.
दोन दिवस डांबून ठेवले
चितेगावला गेल्यानंतर सोनमने मला घरी नेऊन सोडा, असा तगादा मैत्रिणीकडे लावला. मात्र, मैत्रिणीसह दोघांनी सोनमला धमकावले. त्या तिघांनी तिला श्रीमंत व्यक्तीबरोबर तुझे लग्न लावणार असल्याचे सांगितले. मात्र, सोनमने लग्नास विरोध केल्याने त्या तिघांनी तिला दोन दिवस घरातच डांबून ठेवले.
