जळगाव मिरर | ११ ऑक्टोबर २०२३
अवैध वाळूने भरलेले ट्रॅक्टरवर कारवाई करीत ते जमा करण्यासाठी जिल्हाधिकारी कार्यालयाच्या आवारात आणले. याठिकाणी रजिस्टरमध्ये नोंद करीत असतांना ट्रॅक्टर अजय समाधान कोळी (रा. निमखेडी) या चालकाने सहाय्यक तलाठी यांना धक्काबुक्की त्याठिकाणी लावलेले बॅरीकेट्स तोडून ट्रॅक्टर पळवून घेवून गेला. ही घटना मंगळवारी दुपारी २ वाजेच्या सुमारास घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, जळगाव तालुक्यातील शिरसोली येथील आकाश विजय काळे हे म्हसावद येथे सहाय्यक तलाठी म्हणून नियुक्त आहेत. मंगळवारी सकाळी ८ वाजता त्यांना अवैध वाळू वाहतुकीवर आळा घालण्यासाठी व जळगाव तालुक्यातील होणारी अवैध वाळू वाहतुक रोखण्यासाठी पथक तयार केले आहे.
या पथकामध्ये कंडारी येथील तलाठी प्रज्ञाराणी वंजारी, नांद्रा येथील तलाठी राजकन्या घायवट, पोलीस अंमलदार अजय ठाकूर यांचा समावेश आहे. दुपारी साडेबारा वाजेच्या सुमारास उपविभागीय अधिकारी महेश सुधळकर यांनी पथकाला अजिंठा चौकात बोलाविले. याठिकाणी त्यांनी विना क्रमांकाचे वाळूने भरलेले वाहन पकडले होते. पथक याठिकाणी दाखल झाल्यानंतर उपविभागीय अधिकाऱ्यांनी ते ट्रॅक्टर पथकाच्या ताब्यात देवून त्याच्यावर कारवाई करण्याच्या सूचना दिल्या.
पथक वाळूने भरलेले ट्रॅक्टर घेवून जिल्हाधिकारी कार्यालयाच्या बाजूला असलेल्या प्रशासकीय इमारतीच्या आवारात आणले. याठिकाणी ट्रॅक्टरची वाळू वाहतुकीच्या रजिस्टरमध्ये नोंद करत असतांना ट्रॅक्टरवरील चालक अजय समाधान कोळी (रा. निमखेडी) याने सहाय्यक तलाठी यांना धक्का मारला आणि त्याठिकाणी लावलेले बॅरीकेट्स तोडून तो ट्रॅक्टर पळवून घेवून गेला. याप्रकरणी त्याच्याविरुद्ध शासकीय कामात अडथळा आणल्याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.