जळगाव मिरर | २४ ऑक्टोबर २०२३ | राज्यातील समृद्धी महामार्गावर गेल्या काही महिन्यापासून अपघातांची मालिका सुरू असतांना आज पुन्हा एकदा दीक्षाभूमीला जाणाऱ्या अनुयायांच्या वाहनाला समृद्धी महामार्गावर भीषण अपघात झाला आहे. अमरावतीच्या धामणगाव रेल्वे तालुक्यातील निंभोरा बोडखाजवळ ही घटना घडली आहे.
मिळालेल्या माहितीनुसार, दीक्षाभूमीला जाणाऱ्या डॉ.बाबासाहेब आंबेडकरांच्या अनुयायांच्या वाहनाला समृद्धी महामार्गावर अपघात झाला. अमरावतीच्या धामणगाव रेल्वे तालुक्यातील निंभोरा बोडखाजवळ पहाटेच्या सुमारास ही घटना घडली. या अपघातामध्ये १४ जण जखमी झालेत. अपघाताची माहिती मिळताच अमरावती पोलिसांनी घटनास्थळी धाव घेत जखमींना तात्काळ नजीकच्या ग्रामीण रुग्णालयात उपचारासाठी दाखल केले.
धम्मचक्र प्रवर्तन दिनानिमित्त डॉ. बाबासाहेब आंबेडकरांचे अनुयायी नागपूरच्या दीक्षाभूमीला जात आहेत. बुलडाणा जिल्ह्यातल्या चिखली येथील काही अनुयायी पिकअपने दीक्षाभूमीला बाबासाहेबांना अभिवादनसाठी जात होते. त्याचवेळी समृद्धी महामार्गावरील निंभोरा बोडखाजवळ पिकअपला अपघात झाला. चालकाला झोप लागल्यामुळे हा अपघात झाल्याचा प्राथमिक अंदाज वर्तवला जात आहे. या अपघातामध्ये अनेकांच्या पायाला, हाताला आणि डोक्याला दुखापत झाली आहे. यामधील काहींची प्रकृती गंभीर आहे. या अपघातामध्ये जखमी झालेल्यांमध्ये महिलांचा देखील समावेश आहे. जखमींवर सध्या ग्रामीण रुग्णालयामध्ये उपचार सुरू आहेत. या अपघाताचा तपास बुलडाणा पोलिसांकडून सुरू आहे.
