जळगाव मिरर | २७ ऑक्टोबर २०२३
सोशल मिडीयाच्या माध्यामतून अनेक तरुण-तरुणी एकत्र येत असतात. त्यातून मैत्री आणि त्यातून प्रेम देखील बहरत असते. अनेकदा प्रियकर प्रेयसीला इंप्रेस करण्यासाठी काय करेल कुणीही सांगू शकत नाही. अशीच एक थरारक घटना पुण्यात घडली आहे. गर्लफ्रेंडला इंप्रेस करण्यासाठी दोन तरुणांनी पुणे शहरात मोबाईल चोरी केल्याचा प्रकार उघडकीस आला आहे. याप्रकरणी पोलिसांनी दोघांना अटक केली आहे. त्यांच्याकडून 2 लाख रुपयांचे 15 मोबाईल जप्त केले असून एक गुन्हा उघडकीस आला आहे. भारती विद्यापीठ पोलिसांनी ही कारवाई बुधवारी दि.25 कात्रज तलाव परिसरात केली.
पोलिसांनी संशयित आरोपी अर्जुन महादेव शेलार (वय-18 वर्ष 6 महिने), प्रेम राजु शेलार (वय-20 दोघे रा. मु.पो. भिवरी, ता. पुरंदर, जि. पुणे) यांना बेड्या ठोकल्या आहे. भारती विद्यापीठ पोलीस ठाण्यातील तपास पथकाचे अधिकारी व अंमलदार पेट्रोलींग करत होते. त्यावेळी पोलीस अंमलदार मंगेश पवार व निलेश खैरमोडे यांना माहिती मिळाली की, कात्रज तलाव येथे दोनजण चोरीचे मोबाईल विक्री करण्यासाठी आले आहेत. त्यानुसार पथकाने सापळा रचून दोघांना ताब्यात घेतले.
आरोपींकडे असलेल्या बॅगेची झडती घेतली असता त्यामध्ये वेगवेगळ्या कंपन्यांचे 15 मोबाईल फोन मिळाले. मोबाईल बाबत त्यांच्याकडे केलेल्या चौकशी आरोपींनी मोबाईल कात्रज, गोकुळनगर, कोंढवा भागातून चोरल्याचे निष्पन्न झाले. त्यामधील एका मोबाईल फोन बाबत पोलीस ठाण्यात गुन्हा दाखल असल्याचे उघड झाले. आरोपींकडून 2 लाख 2 हजार रुपयांचे 15 मोबाईल जप्त केले असून एक गुन्हा उघडकीस आला आहे. तर 14 फोनबाबत तपास सुरु आहे. आरोपींकडे सखोल चौकशी केली असता त्यांनी त्यांच्या गर्लफ्रेंडला इंप्रेस करण्यासाठी शहरातील विविध भागातून मोबाइल चोरल्याची कबुली दिली.
ही कारवाई पोलीस आयुक्त रितेश कुमार , सह पोलीस आयुक्त संदिप कर्णिक , अपर पोलीस आयुक्त प्रविणकुमार पाटील, पोलीस उपायुक्त स्मर्तना पाटील, सहायक पोलीस आयुक्त नारायण शिरगावकर यांच्या मार्गदर्शनाखाली वरिष्ठ पोलीस निरीक्षक विनायक गायकवाड , पोलीस निरीक्षक गुन्हे विजय पुराणिक, पोलीस निरीक्षक गुन्हे गिरीश दिघावकर, सहायक पोलीस निरीक्षक अमोल रसाळ, पोलीस उपनिरीक्षक धिरज गुप्ता, पोलीस अंमलदार मंगेश पवार, निलेश खैरमोडे, सचिन सरपाले, शैलेश साठे, चेतन गोरे, महेश बारावकर, निलेश ढमढेरे, अवधुत जमदाडे, अभिजीत जाधव, आशिष गायकवाड, अभिनय चौधरी, राहुल तांबे, विक्रम सावंत, हर्षल शिंदे यांच्या पथकाने केली.
